5-6-oktyabr kúnleri Qaraqalpaqstan Respublikasında «Oraylıq Aziya pedagogları – bir region, bir hawaz, bir kúsh» súreni astında Oraylıq Aziya pedagoglarınıń xalıqaralıq forumı ótkerilmekte.

Onda Oraylıq Aziya mámleketleri (Ózbekstan, Qazaqstan, Qırǵızstan, Tájikstan, Túrkmenstan) bilimlendiriw ministrlikleri, atap aytqanda, Ázerbayjan hám Túrkiya mámleketleriniń bilimlendiriw sisteması xızmetkerleri, pedagoglar hám keń jámiyetshilik wákilleri qatnaspaqta.
Forum ilajları sheńberinde qatnasıwshılar Shımbay rayonında boldı. Sapar dawamında olar rayon hákimligi tárepinen shólkemlestirilgen ilajda qaraqalpaq xalqınıń bay milliy dástúrleri, milliy taǵamları hám ónermentshiligi menen jaqınnan tanıstı.
Ilajda qaraqalpaq xalqınıń bay mádeniy miyrası hám dástúriy qádiriyatları miymanlarda úlken tásir qaldırdı.
Forum qatnasıwshıları bunnan keyin Taxtakópir rayonında jaylasqan «Qaratereń» turistlik orayına keldi hám bul jerdegi bir qatar mádeniy-aǵartıwshılıq ilajlarda qatnastı.
Atap aytqanda, etnoturistlik aymaqta jaratılǵan sharayatlar, qara úy qurıw processleri, haqıyqıy shól ortalıǵı kópshilikte qızıǵıwshılıq oyattı. Sonday-aq, aymaqta shólkemlestirilgen qaraqalpaq milliy kórkem óneri úlgileri hám etnografiyalıq kórkem shıǵıwlar miymanlarda úlken tásir qaldırdı.
– Qaraqalpaqstanda ótkerilip atırǵan bul forumǵa Oraylıq Aziya mámleketleri ushın oǵada áhmiyetli ilaj bolıp tabıladı, – deydi qazaqstanlı pedagog Gúlnara Muqasheva. – Ilaj sheńberinde respublikańızdıń kóplegen orınlarında bolıp, úlkeńizdiń ájayıp tábiyatı hám miymandos adamları mende jaqsı tásir qaldırdı. Bunday ilajlar ele de dawam ete beriwine tileklespen.
Kúnniń ekinshi yarımında pedagoglar ushın oqıw-seminar ilajları shólkemlestirildi.

Qaraqalpaqstan xabar agentligi