Berdaq atındaǵı Qaraqalpaq mámleketlik akademiyalıq muzıkalı teatrında hám Ózbekstan mámleketlik konservatoriyası Nókis filialında «ItARTs» joybarı sheńberinde festival ótkerilip, Italiya hám qaraqalpaq milliy sazları orın alǵan koncertler, italiyalı tájiriybeli ustazlardıń sheberlik sabaqları shólkemlestirildi.

Bıyılǵı jıldıń 15-fevral kúni Italiyanıń Akvila qalasındaǵı «ALFREDO CASELLA» konservatoriyası menen xalıqaralıq grant tiykarında birge islesiw memorandumına qol qoyılǵan edi. Usı kelisim tiykarında italiyalı kórkem óner hám mádeniyat tarawı xızmetkerleri menen birgelikte «ItARTs» joybarı sheńberinde shólkemlestirilgen festival muzıka kórkem óneri ıqlasbentleri ushın ájayıp sawǵa boldı.
Festival sheńberinde Berdaq atındaǵı Qaraqalpaq mámleketlik akademiyalıq muzıkalı teatrında bolıp ótken koncerttiń birinshi bóliminde respublika hám xalıqaralıq tańlawlardıń laureatı «Jayhun» xalıq sazları orkestri tárepinen kórkemlik jaqtan jetekshi “Shuhrat” medalınıń iyesi, Qaraqalpaqstanǵa xızmet kórsetken jaslar ustazı, professor Hikmet Rajabov dirijyorlıǵında Joakkino Rossinidiń “Sevilyalı shahzada” operasınan uvertyura, Eduardo di Kapua, Djovanni Kapurronıń “O Sole mio,” Italiya kompozitorlarınıń shıǵarmalarınan popurri, Luidji Densanıń “Funikuli-funikula,” Ernesto de Kurtistiń “Torna a Surriento,” Joakkino Rossinidiń “Kavatina figar,” Djuzeppe Verdidiń “Traviata” operasınan “Zastolnaya pesnya” sıyaqlı Italiya muzıka kórkem óneriniń belgili shıǵarmaları ayrıqsha sheberlik penen atqarıldı.
Ekinshi bólimde italiyalı studentler tárepinen Klaudio Monteverdi, Franchesko Kavalli, Domeniko Skarlatti, Domeniko CHimaroza, Rossini Joakkino, Juzeppe Verdi, Jakomo Puchchini operalarınan úzindiler atqarıldı.
Festivaldıń ekinshi kúninde italiyalı tájiriybeli ustazlar student-jaslar ushın sheberlik sabaqların ótti. Olar ózleriniń teoriyalıq hám ámeliy bilimlerin jáne de bekkemledi. Solay etip, italiyalı kórkem óner tarawı xızmetkerleriniń Aralboyına saparı umıtılmas waqıyalarǵa bay boldı. Ellerimiz arasındaǵı mádeniy baylanıslar jáne de bekkemlenip, muzıka kórkem óneriniń rawajlanıwına óziniń úlesin qostı.

Qaraqalpaqstan xabar agentligi.