Nókis qalasında «HealthTech Hackathon» sınaq basqıshı start aldı.

Onda Qaraqalpaqstan Respublikası Joqarǵı Keńesiniń komitet baslıǵı M.Atamuratov shıǵıp sóylep, sońǵı jılları elimizde Prezidentimiz basshılıǵında barlıq tarawlar sıyaqlı bilimlendiriw tarawın, sonıń ishinde sanlı texnologiyalardı rawajlandırıw hám turmısqa engiziw boyınsha alıp barılıp atırǵan reformalardı úlken qanaatlanıwshılıq penen atap ótti hám ilaj jumısına tabıslar tiledi.
Sonı aytıp ótiwimiz kerek, bul ilaj mámleketimizdegi ulıwma milliy jasalma intellekt xakaton joybarınıń birinshi basqıshı esaplanadı. AI Hackathon joybarı 2025-jıl oktyabrnen 2026-jıl dekabrge shekem basqıshpa-basqısh ámelge asırıladı hám onda 5 mıńnan aslam qatnasıwshı qatnasıp, densawlıqtı saqlaw, bilimlendiriw, sud sisteması, suw xojalıǵı hám isbilermenlik baǵdarları boyınsha innovaciyalıq sheshimlerdi islep shıǵıwı kútilmekte.
Nókiste ótkerilip atırǵan “HealthTech Hackathon”nıń tiykarǵı maqseti – medicina tarawında sanlı transformaciya processlerin jedellestiriw bolıp tabıladı. Joybar mámleketimizdiń medicina jámiyetshiligi hám IT-qánigelerin bir maydanǵa toplap, sanlı densawlıqtı saqlaw baǵdarında jańa sheshimler jaratıw ushın nátiyjeli milliy platforma qáliplestiriwdi názerde tutadı.
Ilaj IT hám medicinalıq joqarı oqıw orınlarınıń studentleri, jas shıpakerler, IT qánigeleri hám medicina mákemeleriniń wákilleriniń qatnasıwında dawam etpekte.

Qaraqalpaqstan xabar agentligi