Nókis qalasında Qaraqalpaqstan Respublikası Joqarǵı Keńesi Baslıǵınıń orınbasarı, Ózbekstan Respublikası boks federaciyası Qaraqalpaqstan bóliminiń baslıǵı Radjapbay Nurazizov basshılıǵında boks sport túrinde búgingi kúnde ámelge asırılıp atırǵan jumıslar boyınsha gezektegi jıynalıs bolıp ótti.

Onda sońǵı jılları barlıq tarawlar qatarında elimizde sport tarawın rawajlandırıw hám ǵalabalıq sporttı en jaydırıw boyınsha ámelge asırılıp atırǵan jumıslar, Ózbekstan Respublikası Prezidentiniń basshılıǵında tarawǵa qaratılıp atırǵan itibar hám jaratılıp atırǵan sharayatlar haqqında keń túrde atap ótti.
Sonday-aq, basqa sport túrleri qatarında Qaraqalpaqstan Respublikasında boksti ele de rawajlandırıw, sportshılarımızdıń joqarı nátiyjelerge erisiwi ushın bunnan bılay da keń imkaniyatlar jaratıw 2028-jılı Los-Anjeles qalasında bolıp ótetuǵın XXXIV jazǵı Olimpiada hám Paralimpiada oyınlarına tayarlıqlar kóriw, licenziya alıw hám medallar sanın kóbeytiw ushın kúshli tayarlıqlardı kóriw máseleleri sóz etilip, aldaǵı wazıypalar belgilep alındı.
Ótkerilgen ilajda 1-oktyabr – Muǵallimler hám ustazlar kúni múnásibeti menen jas boksshilerdi elimizde hám sırt ellerde ótkerilip atırǵan jarıslarǵa tayarlawdaǵı pidayılıǵı hám belsendiligi ushın bir topar trenerlerge Ózbekstan Respublikası boks federaciyası Qaraqalpaqstan bóliminiń Minnetdarshılıq xatları tapsırıldı.

Adilbay Orazov,
Qaraqalpaqstan xabar agentligi sholıwshısı