Házirgi kúnde sociallıq tarmaqlarda blog júrgiziw hár bir insan ushın ápiwayı jaǵdayǵa aylanǵan. Endi bul platformalar tek ǵana súwret hám videolardı bólisiw ornı emes, al hár qıylı kásip iyeleri ushın óz jumısın kórsetiw, qarıydarlar bazasın keńeytiw hám professional portfolio sıpatında xızmet etpekte.

Blog júrgiziwdiń unamlı tárepleri kóp. Mısalı, sociallıq tarmaqlardaǵı blog arqalı insan ózin keń auditoriyaǵa tanıstırıwı, jumıs iskerligin kórsetip, qarıydarlar aǵımın arttırıwı múmkin. Sonday-aq, bloglar arqalı qánigeler jańa xızmetler hám ónimlerin úgit-násiyatlaydı, óz tarawındaǵı jańalıqlar hám bilimlerin basqalar menen bólisedi.
Sociallıq tarmaqlar millionlaǵan paydalanıwshılarǵa iye bolıp, bul platformalar qánigege óz xızmetlerin kórsetiwde keń imkaniyatlar jaratadı. Blog arqalı qánigeler óziniń jeke brendin jaratıwı hám qarıydarlar menen ańsat baylanısqa kirisiwi múmkin. Bul arqalı isenimli jeke imidjin jaratıp, keń auditoriyaǵa iye bola aladı. Qalaberdi, jumıs úlgileri, usınıslar, tabıslı nátiyjeler menen qánige óz tájiriybesin kórsetiwi múmkin.
Sonıń menen birge, blog júrgiziwde ayırım unamsız jaǵdaylar da ushırasıp turadı. Ásirese, sociallıq tarmaqlardıń ǵalabalasıwı menen hár bir adamnıń qánige bolıp kóriniwge umtılıwı nátiyjesinde sapalı xızmet kórsetiw normaları tómenlep barmaqta. Mısal ushın, ayırım qánigeler basqalar qoyǵan jumıslardı óz bloglarına jaylastıradı hám xızmet sapası professional qánigeden ádewir tómen boladı. Qarıydarlar bolsa jazılıwshı hám kóriwler sanına qarap qánige tańlawı bunday jalǵan qánigelerdiń bazarı keńeyiwine de sebep bolmaqta. Ásirese, medicina, bilimlendiriw, kosmetologiya sıyaqlı tarawlarda sapa qadaǵalawınıń jeterli emesligi kóp mashqalalardı keltirip shıǵarmaqta.
Máselen, ayırım ápiwayı kosmetologlar blefaroplastika sıyaqlı quramalı operaciyalardı orınlawǵa urınıp, nawqaslarda unamsız tásirler keltirip shıǵarmaqta. Yamasa oqıtıwshılar qısqa múddette IELTS sertifikatına iye bolıwdı wáde etip, haqıyqatında bolsa ulıwma qanaatlandırarsız sabaqlar alıp barıp atırǵanı da kúndelikli turmısımızda tez-tez júz beretuǵın waqıyalardan biri bolıp esaplanadı. Bunday jaǵdaylar ayrıqsha qáweterleniw oyatıp, sociallıq tarmaqlarda qánige tańlawda abaylılıq zárúrligin kórsetpekte.
Hár bir insan sociallıq tarmaqlarda qánige tańlawdan aldın, blogtaǵı jumısqa emes, al qánigeniń mamanlıǵı hám jumıs tájiriybesine tiykarlanǵan tańlawdı ámelge asırıwı áhmiyetli. Qánigeniń bilim alǵanlıǵı haqqındaǵı diplom hám sertifikatların da tekseriw onıń tájiriybesi hám bilimin tekseriw ushın isenimli derek sıpatında xızmet etedi. Hár qanday xızmette sapaǵa ayrıqsha itibar beriw, nátiyjeler menen bahalaw kerek.
Sociallıq tarmaqlar arqalı óz jumısın kórsetiw imkaniyatı kóplegen kásip iyeleri ushın júdá úlken abzallıq bolıp esaplanadı. Biraq, bul imkaniyatlardan paydalanǵan halda xızmet sapasınıń tómenlewi hám jalǵan reklama jaǵdayları kóbeymekte. Sonıń ushın hár bir insan ózine kerekli qánigeni tańlawda tek ǵana sociallıq tarmaqtaǵı blogına emes, al onıń haqıyqıy bilim hám tájiriybesine de itibar beriwi kerek.
Bunnan tısqarı, qánigeler de óz jumısın haqıyqatqa sáykes, sapalı hám hadal túrde alıp barıwı zárúr. Bul tek ǵana olardıń abıray-mártebesin arttırıp qoymastan, al qarıydarlar menen uzaq múddetli hám isenimli qatnasıqlardı bekkemleydi. Solay etip, sociallıq tarmaqlar dúnyasında sapalı xızmet kórsetiw hám haqıyqıy maman qánigelerdi anıqlaw ushın bilim, tájiriybe hám pikirler tiykarında tańlaw búgingi kúnde eń áhmiyetli norma bolıp esaplanadı.

Dildora DWSMATOVA,
ÓzAnıń xabarshısı