Sońǵı jıllarda elimizde baǵshılıq rawajlanıp, eksport kólemi bir neshe esege arttı. Bul baǵdarda Qaraqalpaqstan Respublikasında bazar mexanizmleri tiykarında baǵlar hám júzimzarlardı shólkemlestiriw, eksporttı keńeytiwge qaratılǵan joybarlar ámelge asırıp kelinbekte.

Respublikamız rayonlarındaǵı barlıq xojalıqlarda jámi 7,4 mıń gektar miyweli baǵ, 1,8 mıń gektar júzimzar bolıp, olar jılına 76 mıń tonna miywe hám 14,4 mıń tonna júzim jetistirip bermekte. 2025-jılda 800 gektar maydanda jańa baǵ hám júzimzarlar shólkemlestiriliwi rejelestirilgen. Reje tiykarında báhár aylarında 469 gektar maydanda miyweli baǵ hám 108 gektar maydanda jańa júzimzarlar shólkemlestirildi.
Beruniy rayonında da bul baǵdarda bir qatar ilajlar ámelge asırılmaqta. Rayon baǵbanları baǵshılıqta kóp jıllıq tájiriybege iye. Olardıń hár máwsimde ózara tájiriybe almasıw hám ilimnen paydalanıw ámeliyatın iyelewi, jańa baǵlardıń shólkemlestiriliwine tiykar jaratadı.
Rayonnıń «Biybazar» awıl puqaralar jıyınında jaylasqan baǵshılıqqa qánigelesken «Vaxobjon kosib» fermer xojalıǵınıń ulıwma jer maydanı 7 gektar bolıp, xojalıqta tiykarınan almurt hám júzim jetistiriledi.
Búgingi kúnde fermer xojalıǵında almurttıń 4 túri pisip jetilisken bolıp, tiykarınan qıs máwsimine saqlap qoyıladı. Ózine tán agrotexnikalıq tárbiyadan ótken bul miywelerdiń de saqlanıwınıń sırı bar. Beruniy rayonında ulıwma 577 gektar miyweli baǵlardıń 443 gektarı zúráátke kirgen. Júzimzarlar 92 gektar bolıp, 70 gektarı ónim bermekte hám 22 gektarı jańa baǵlar esaplanadı.

Qaraqalpaqstan xabar agentligi.