Búgin Qaraqalpaqstan kórkem óner sarayında «1-oktyabr – Muǵallimler hám ustazlar kúni» múnásibeti menen bayram saltanatı bolıp ótti.

Ilajǵa respublikamız basshıları, ministrler, bilimlendiriw tarawınıń pidayıları, ustaz-nuraniyler, jaslar hám ǵalaba xabar quralları wákilleri qatnastı.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı kásiplik bayramı menen qutlıqladı.
Atap ótilgenindey, húrmetli Prezidentimiz basshılıǵındaǵı reformalar nátiyjesinde bilimlendiriw tarawın rawajlandırıw boyınsha oǵada úlken nátiyjelerge erisilmekte. Usı iygilikli jumıslardıń dawamı sıpatında barlıq bilimlendiriw mákemeleri hám shólkemleriniń materiallıq-texnikalıq bazası bekkemlenip atır.
Atap aytqanda, usı jılı barlıq baǵdarlamalar tiykarında, jámi 356 mlrd. sumlıq qarjı esabınan 35 mektepte hám 36 baqshada qurılıs-rekonstrukciya jumısları alıp barılıp atır. Sonıń ishinde, bıyılǵı jıldıń ѳzinde joqarı oqıw orınlarında ulıwma bahası 145 mlrd. sumlıq 2150 orınlıq 5 jataqxana paydalanıwǵa tapsırıldı, 3 mektepte xalıqaralıq «Kembridj» oqıw baǵdarlaması eńgizildi. Qaraqalpaqstanlı jaslardı joqarı bilimlendiriwge qamtıp alıw boyınsha ótken úsh jılda 20 mıń, bıyılǵı jılı qosımsha 10 mıń 750 kvota berilgenligi kewillerdi ayrıqsha maqtanısh sezimlerine bólemekte.
Ótkerilgen saltanatlı ilajda mine usınday iygilikli jumıslar haqqında keń túrde sóz etildi.
Bunnan soń Qaraqalpaqstan Respublikası Joqarǵı Keńesiniń Prezidiumı qararı menen bir topar taraw pidayılarına húrmetli ataqlar, kókirek belgileri hám xoshametlew sıylıqları saltanatlı túrde tapsırıldı.
– Biziń mektebimizdiń tárbiyalanıwshıları elimiz hám xalıqaralıq kólemdegi jarıslarda jeńimpazlıqtı qolǵa kirgizip, mámleketimiz bayraǵın bálentlerde jelbiretip kelmekte. Meniń sportshı jaslardı tayarlawdaǵı azı-kem miynetlerim inabatqa alınıp, «Qaraqalpaqstan Respublikasına miyneti sińgen jaslar ustazı» húrmetli ataǵı menen sıylıqlandım,-deydi Respublikalıq oyın túrlerine qánigelesken sport mektebiniń direktorı Dáwletmurat Qalqorazov. – Bizler keleshekte de xalıqaralıq sport jarıslarında joqarı nátiyjelerdi kórsetetuǵın sportshılardı tayarlawda ayanbastan xızmet ete beremiz.
Saltanatlı ilaj respublika kórkem óner sheberleri tárepinen tayarlanǵan yoshlı koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı