Ustazlıq ullı mártebe. Kóziniń nurın, júreginiń otın jas áwladtıń bilim alıwı jolında sarıplap, olardıń keleshegine bekkem tiykar jaratıp atırǵan muǵallim hám ustazlardıń islep atırǵan miyneti hár qanday maqtawǵa turarlıq.

Elimizde hár jılı 1-oktyabr – Muǵallimler hám ustazlar kúni joqarı dárejede ótkeriledi. Bıyılǵı jılı da bul bayram respublikamızdıń barlıq aymaqlarında bolǵanı sıyaqlı, Shımbay rayonında da kóterińki ruwxta belgilendi.
Ilajǵa rayon basshıları, deputatlar, taraw pidayıları, nuranıylar hám ǵalaba xabar qurallarınıń wákilleri qatnastı.
Onda rayon hákimi A.Tajetdinov ilaj qatnasıwshıların kásiplik bayramı menen qutlıqlap, sońǵı jıllarda Prezidentimiz basshılıǵında bilimlendiriw tarawında ámelge asırılǵan reformalar, qolǵa kirgizilgen jetiskenlikler hám tabıslarǵa keńnen toqtap ótti.
Ilajda bir qatar miynet aldıńǵılarına rayon hákimliginiń Húrmet jarlıqları hám estelik sawǵalar tapsırıldı.
Bayram keshesi respublikamızǵa belgili kórkem óner sheberleri hám rayonlıq mádeniyat bólimi xızmetkerleri tárepinen tayarlanǵan koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı.