Qıtaydıń Galbot kompaniyası tárepinen jaratılǵan hám tolıq gumanoid robot tárepinen basqarılatuǵın azıq-awqat dúkánı rásmiy túrde iske qosıldı. Bul dúkán insan aralasıwısız isleytuǵın birinshi avtonom sawda orayı bolıp esaplanadı.

Dúkánda birden-bir xızmetker – Galbot G-1 atlı jasalma intellektke iye gumanoid robot. Ol keliwshilerdi kútip aladı, buyırtpalardı qabıl etedi hám ónimlerdi jetkerip beredi. Dúkán kishi bolıwına qaramastan, kúnine mıńlap qarıydarlarǵa xızmet kórsetedi.
Robot óz betinshe islep atırǵan bolsa da, ol ele barlıq tárepleme jetik emes. Galbot G-1 ónimlerdi áste háreket penen alıp keledi, bul bolsa uzın náwbetlerge sebep bolmaqta. Sonday-aq, sırtqı shawqımlar robottıń qarıydarlar menen baylanısın qıyınlastırıwı múmkin.
Galbot kompaniyası basshısı Ven Ayrong bul joybar haqqında bılay deydi: – Bul tek ǵana dúkán emes, al usaqlap satıwǵa bolǵan qatnasımızdaǵı jańa basqısh bolıp esaplanadı. Biz bul texnologiyanı Qıtaydıń basqa qalalarına da engiziwdi rejelestirip atırmız.
Kompaniya házirgi waqıtta robotlardıń tezligin arttırıw, shawqımǵa beyimlese alatuǵın dawıs sistemaların engiziw hám jasalma intellektti jáne de jetilistiriw ústinde jumıs alıp barmaqta.
Bul joybar sawdanıń keleshegi haqqında qatań sorawlardı ortaǵa taslamaqta. Avtonom dúkánlar turaqlı islewi, jumısshı kúshi jetispewshiligin saplastırıwı hám qárejetlerdi azaytıwı múmkin. Biraq házirshe bul tek sınaq basqıshı.
Robotlar adam ornın basa ala ma yamasa bul tek marketing tájiriybesi me – waqıt kórsetedi. Biraq bir nárse anıq: Pekindegi bul kishi dúkán úlken texnologiyalıq ózgerislerdiń baslanıwı bolıwı múmkin.

Madinabonu Nasrieva,
Uluǵbek Twxtaev,
ÓzAnıń xabarshıları