Ózbekstan Respublikası Joqarǵı sudınıń baslıǵı Baxtiyor Islomov elimizge kelgen Túrkiya Respublikası Mámleketlik keńesi (Joqarı hákimshilik sudı) baslıǵı Zeki Yigit penen ushırastı.

Sóylesiwde xalıqlarımızdı kóp ásirlik tariyx, til, din, qádiriyatlar hám uqsas úrp-ádetler bir-birine tıǵız baylanıstırıp turatuǵını atap ótildi. Mámleketlerimiz arasında óz-ara isenimge tiykarlanǵan doslıq qatnasıqlar búgingi kúnde izbe-iz bekkemlenip barmaqta.
Ushırasıwda miymanlar Ózbekstanda keyingi jıllarda sud-huqıq sistemasın bunnan bılay da jetilistiriw, puqaralar hám isbilermenlerdiń huqıqları menen nızamlı máplerin isenimli qorǵaw ilajların kúsheytiw, ádil sudlawdı nátiyjeli támiyinlew hám sudyalar jámiyetshiliginiń rolin arttırıw baǵdarında ámelge asırılıp atırǵan keń kólemli reformalar menen tanıstırıldı.
Prezidentimizdiń usı jıl 21-avgusttaǵı “Sudlardıń jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı qosımsha ilajlar haqqında”ǵı pármanı miymanlarda úlken qızıǵıwshılıq oyattı.
Elimizde mámleketlik uyımlar menen qatnasıqlarda puqaralar hám isbilermenlerdiń huqıqların qorǵawdı támiyinlewde sistemalı reformalar alıp barılıp atırǵanı aytıp ótildi.
Mámleketimiz basshısınıń 2025-jıl 30-yanvardaǵı “Puqaralar hám isbilermenlik subektleriniń huqıqların sud arqalı qorǵawdıń zamanagóy mexanizmlerin engiziwge baylanıslı qosımsha ilajlar haqqında”ǵı qararı menen tastıyıqlanǵan Ózbekstan Respublikası hákimshilik sud jumısların júrgiziw haqqındaǵı nızamshılıqtı jetilistiriw koncepciyasın ámelge asırıw sheńberinde jańa redakciyadaǵı Hákimshilik sud jumısların júrgiziw haqqındaǵı kodeks joybarı ústinde keń kólemli jumıslar alıp barılıp atırǵanı atap ótildi.
Tárepler hákimshilik sudlaw tarawın bunnan bılay da jetilistiriw máselesi boyınsha óz-ara tájiriybe almasıw baǵdarında jedel birge islesiwge tayar ekenin bildirdi.
Issheń hám doslıq ruwxında ótken ushırasıwda basqa da máseleler boyınsha pikir alısıldı.
Túrkiyalı miyman Joqarı sud muzeyi menen de tanıstı.

N.Abduraimova,
ÓzAnıń xabarshısı