2026-jıl fevral ayında NASA tórt astronavttı adamzat tariyxındaǵı eń uzaq párwazǵa jiberiwdi rejelestirmekte.

“Artemida-2” missiyası 1972-jıldan berli adamlardıń Jer átirapındaǵı tómen orbitadan sırtqa birinshi párwazı boladı.
Tómende onıń ózine tán tárepleri:
Aydan da arı. Ekipaj Aydı aylanıp ótedi hám onıń orbitasınan 9200 km den artıq aralıqqa qashıqlasadı – ele hesh bir insan Jerden bunshelli uzaqqa barmaǵan.
Ózgeshe ekipaj. Birinshi márte Ay missiyasında hayal (Kristina Kuk), afroamerikalı (Viktor Glover) hám amerikalı bolmaǵan (Kanadalı Jeremi Xansen) qatnaspaqta. Ekipajǵa Rid Uayzmen basshılıq etedi.
Qonıwǵa tayarlıq. Maqset tek ǵana Ayǵa jetip barıw emes. Bul párwaz 50 jıl ishinde birinshi márte Ayǵa qonıwǵa (“Artemida-3” missiyası sheńberinde) hám keleshekte Marsqa párwazǵa tayarlıq kóriwge qaratılǵan.
Eger hámme nárse reje boyınsha barsa, ushıw 2026-jıl 5-fevralda ámelge asırıladı.

Qaraqalpaqstan xabar agentligi