Ózbekstan Respublikası Joqarı bilimlendiriw, ilim hám innovaciyalar ministrliginiń 2024-jıl 27-dekabrdegi 490-sanlı qararı tiykarında, Berdaq atındaǵı Qaraqalpaq mámleketlik universitetinde “Jınayat hám jınayat-processual nızamshılıǵın jetilistiriw máseleleri” atamasında respublikalıq ilimiy-ámeliy konferenciya ótkerildi.

Oǵan Oliy Majlis Nızamshılıq palatasınıń deputatı, Isbilermenlik, básekini rawajlandırıw hám sanaat máseleleri komiteti baslıǵınıń orınbasarı S.Utemuratova, Nókis qalası prokuraturasınıń aǵa tergewshisi M.Kulumbetov, elimizdegi joqarı oqıw orınlarınıń professor-oqıtıwshıları, huqıqtanıwshı ilimpazlar, ilimiy izleniwshiler hám ámeliyatshı qánigeler qatnastı.
Konferenciyanı universitettiń Ilimiy isler hám innovaciyalar boyınsha prorektorı I.Turdımambetov ashtı hám alıp bardı. Ilaj dawamında jınayat hám jınayat-processual nızamshılıqtı jetilistiriwdiń teoriyalıq hám ámeliy tárepleri dodalanıp, huqıqıy tarawda alıp barılıp atırǵan reformalardıń ilimiy tiykarları sáwlelendirildi.
Ótkerilgen ánjuman sheńberinde qatnasıwshılar tárepinen tiyisli baǵdarlarda ilimiy maqalalar usınıldı, qánigelerdiń bayanatlarında jınayat nızamshılıǵın rawajlandırıw, onı xalıqaralıq standartlarǵa beyimlestiriw hám ámeliyattaǵı mashqalalarǵa sheshim tabıw máseleleri ayrıqsha itibar orayında boldı.
Bul ilimiy-ámeliy konferenciya jınayat hám jınayat-processual nızamshılıqtı bunnan bılay da jetilistiriw jolında úlken ilimiy hám ámeliy áhmiyetke iye boldı.

Qaraqalpaqstan xabar agentligi