Ózbekstan Respublikası Oliy Majlisi Nızamshılıq palatasınıń deputatı Gúljan Xalmuratova Taqıyatas, Xojeli rayonlarında saylawshılar menen ushırastı hám aymaqtaǵı bir qatar sociallıq obektler menen jaqınnan tanıstı.

Dáslep deputat Taqıyatas rayonındaǵı «Dochki-sınochki» jeke menshik mektepke shekemgi bilimlendiriw shólkeminde tárbiyalanıwshılar ushın jaratılǵan sharayatlardı kózden ótkerdi. Sonday-aq, obektte gúzgi-qısqı máwsimge tayarlıq jumıslarınıń sapasın, ısıtıw úskeneleriniń jaǵdayın úyrendi. Shólkemniń jumısı menen jaqınnan tanısar eken, elimizde sońǵı jılları ámelge asırılıp atırǵan reformalar, nızamshılıqta jańadan qabıl etilip atırǵan nızamlar haqqında keń túrde toqtap ótti. Ózbekstan Respublikası Prezidentiniń Tashkent wálayatı Bostanlıq rayonında Oqıtıwshı hám muǵallimler kúni múnásibeti menen ótkerilgen saltanatlı ilajdaǵı bayanatı hám bilimlendiriwdiń sapasın arttırıw, ustaz hám muǵallimlerdiń miynet hám jasaw sharayatın jaqsılaw boyınsha alǵa qoyılǵan bir qatar baslamalardıń mazmunı, ásirese, mektepke shekemgi bilimlendiriwge qaratılıp atırǵan itibar turmıslıq mısallar menen atap ótildi. 2018-jıldan berli jumıs islep kiyatırǵan bul jeke menshik baqsha 150 orınǵa mólsherlengen bolıp, onda balalar ushın barlıq sharayatlar jaratılǵan.
Deputat «Taqıyatas» mákan puqaralar jıyınında «máhálle jetiligi»niń jumısı menen tanıstı. Óz gezeginde, «jetilik»tiń jumısın jáne de nátiyjeli shólkemlestiriw ushın zárúrli usınıslar berildi.
Keyingi mánzil rayondaǵı shańaraqlıq poliklinika boldı. Bul poliklinika bıyılǵı jıldıń aprel ayında jumıs baslaǵan bolıp, rayondaǵı «Abat mákan», «Aydın jol», «Jayxun» hám «Doslıq» máhállelerinde jasaytuǵın 21 mıńnan aslam xalıqqa xızmet etip kelmekte. Shańaraqlıq poliklinikada tájiriybeli shıpakerler hám miyirbiykeler máhálle turǵınlarınıń densawlıǵın bekkemlewde, olarǵa sapalı medicinalıq xızmet kórsetiwde sanlastırılǵan «DMED» innovaciyalıq platformasınan paydalanıp kelmekte. Xalıq wákili poliklinikadaǵı medicina tarawı wákilleri menen sáwbetleser eken, elimizde sońǵı jılları tarawǵa qaratılıp atırǵan itibar, xalıqtıń densawlıǵın bekkemlew jolında ámelge asırılıp atırǵan ilajlar, korrupciyaǵa qarsı gúresiw hám onıń aldın alıw boyınsha qabıl etilip atırǵan nızamlardıń mazmunın hám áhmiyetin keńnen túsindirip ótti.
Xalıq wákili Xojeli rayonında bolıp, xalıqtıń ishimlik suwı boyınsha múrájatın ornına barıp úyrendi. Xojeli rayonındaǵı «Qumjıqqın» awıl puqaralar jıyınına qaraslı «Toǵız tam» awılınıń turǵınları kópten berli ishimlik suwı mashqalasınan qıynalıp, kanal-salmalardıń suwınan paydalanıp otırǵanın bildirdi. Bul mashqala boyınsha rayonlıq Suw támiynatı bóliminiń juwapker xızmetkerleri «Qumjıqqın» awıl puqaralar jıyınına qaraslı «Toǵız tam», «Nurımbet», «Zerger» hám «Sarataw» awıllarına ishimlik suwı tolıq jetip barıwı ushın kóterip beretuǵın nasos stanciyasın ornatıw kerekligin ayttı. Deputat G.Xalmuratova hám Suw támiynatı bóliminiń juwapker wákilleri tárepinen tiyisli ministrliklerge joqarıdaǵı másele boyınsha usınıslar berilip, kelesi jılı investiciyalıq baǵdarlamaǵa kirgiziletuǵınlıǵı atap ótildi.

Qaraqalpaqstan xabar agentligi