Búgingi kúnde Oliy Majlis Nızamshılıq palatasınıń deputatı Ruslan Djumamuratov Nókis qalasındaǵı máhállelerde bolıp, hár qıylı taraw hám obektlerde úyreniw jumısların alıp barmaqta. Puqaralardıń mashqalaları, usınısları tıńlanbaqta.

Atap aytqanda, “Bayterek” mákan puqaralar jıyınında bolıp, «máhálle jetiligi»niń jumısı menen tanıstı. Máhálle belsendileri hám puqaralar menen ushırastı. Olar «máhálle jetiligi» adamlardıń turmıslıq talaplarına xızmet etip atırǵanın ayrıqsha atap ótti. Ushırasıwda xalıq wákilleri aymaqta jergilikli transport xızmetinen paydalanıw máselesine toqtap, olardıń talabın qanaatlandırıw maqsetinde 72-sanlı jónelistegi marshrutlı taksilerdiń jumısın qaytadan jolǵa qoyıw boyınsha múrájat hám usınısları inabatqa alındı. Sonday-aq, bankler tárepinen ajıratılıp atırǵan barlıq kredit túrleri boyınsha tiyisli qánigelerdiń qatnasıwında seminar shólkemlestiriw usınısı berildi.
Úyreniw dawamında Prezidentimiz tárepinen parlament aǵzalarına máhállege túsip, jınayatlardıń kelip shıǵıw sebeplerin anıqlaw, analizlew hám birgelikte sheshim tabıw, nızamlardı jetilistiriw ilajların kóriw boyınsha bergen wazıypalarınan kelip shıǵıp, usı máselelerge itibar qaratıldı.
Bunnan soń deputat usı aymaqta jaylasqan “EZE KID’S” jeke menshik mektepke shekemgi bilimlendiriw mákemesinde bolıp, partiya baǵdarlamasınıń wazıypalarınan kelip shıqqan halda, bul jerde tárbiyalanıwshılar ushın jaratılǵan sharayatlar menen tanıstı. Sáwbetler dawamında ata-analar shólkemde jaratıp berilgen barlıq sharayatlar ushın elimiz basshısına minnetdarshılıǵın bildirdi.
Úyreniwlerde anıqlanǵan kemshilik hám mashqalalar tiyisli ilajlar kóriw maqsetinde deputattıń qadaǵalawına alındı. Oliy Majlis Nızamshılıq palatasınıń deputatı, ÓzMTDP frakciyasınıń aǵzası Ruslan Djumamuratovtıń orınlarda úyreniwleri dawam etpekte.

Qaraqalpaqstan xabar agentligi .