Ózbekstan Respublikası Prezidenti Sh.Mirziyoevtiń atalarsha ǵamqorlıǵı hám itibarı nátiyjesinde qaraqalpaqstanlı jaslarǵa bir qatar imkaniyatlar jaratıp berilmekte.

Usılar qatarında 2022-jıl 31-avgusttaǵı 213-sanlı Prezident pármanı menen hár jılı Qaraqalpaqstan Respublikasında turaqlı jasaytuǵın hám de ulıwma orta, orta arnawlı hám professional bilimlendiriw mákemelerin tamamlaǵan jaslar ushın tólemli-kontrakt tiykarında qosımsha kvotalar ajıratılıp kelinbekte. Bıyılǵı jılı da respublikamızdıń qala hám rayonları ushın zárúr bolǵan qánigelikler sanınan hám kadrlardıń ishki zárúrliginen kelip shıǵıp, Prezident pármanı tiykarında 10 mıń qosımsha kvota ajıratıldı.
Usı qosımsha kvota tiykarında joqarı oqıw orınlarına student bolǵan jaslar qatarında Nókis qalası 1-sanlı qánigelestirilgen mektep-internatı 2024-2025-oqıw jılı pitkeriwshilerinen Dinara Jumabaeva, Asqarbek Galiev hám Feruza Marqabaevalar da bar.
– Bıyıl Qaraqalpaqstan medicina institutınıń emlew isi baǵdarına oqıwǵa tapsırıp, 156,1 ball menen kire almaǵan edim, – deydi Dinara Jumabaeva. – Húrmetli Prezidentimizdiń qaraqalpaqstanlı jaslarǵa kórsetip atırǵan ǵamqorlıǵınıń arqasında, qosımsha kvota menen ózim qálegen oqıw ornına kiriwge miyasar boldım. Bunıń ushın Prezidentimizge úlken raxmet aytaman.
– Ótken oqıw jılında mektebimizdi anıq hám tábiyǵıy pánler baǵdarı boyınsha 25 oqıwshı pitkerip, sonnan 22 oqıwshı joqarı oqıw ornına kirgen edi, – deydi usı mektep-internatı direktorı Marat Ibrayımov. – Húrmetli Prezidentimizdiń arnawlı pármanı tiykarında, pitkeriwshilerimizden Dinara Jumabaeva hám Asqarbek Ǵaliev Qaraqalpaqstan medicina institutınıń emlew isi hám stomatologiya fakultetine, Feruza Marqabaeva Ferǵana mámleketlik institutınıń yuristprudenciya baǵdarına oqıwǵa kiriwge miyasar boladı. Sonıń menen, Nókis qalası 1-sanlı qánigelestirilgen mektep-internatı 2024-2025- oqıw jılı pitkeriwshileriniń joqarı oqıw orınlarına kiriw kórsetkishi boyınsha 100 procentti kórsetti.
Bunıń ushın húrmetli Jurtbasshımızǵa úlken raxmet aytamız.

Adilbay Orazov,
Qaraqalpaqstan xabar agentligi sholıwshısı.