Búgin Moskva qalasındaǵı Xalıq xojalıǵı jetiskenlikleri kórgizbesi kompleksinde atom hám oǵan jaqın tarawlarǵa baǵıshlanǵan eń iri ilaj – Jáhán atom hápteliginiń (World Atomic Week) rásmiy ashılıw máresimi bolıp ótti.

Bul abıraylı ilajdıń saltanatlı ashılıw máresiminde “Rosatom” mámleketlik korporaciyasınıń juwapkerleri, atom baǵdarlamaların rawajlandırıp atırǵan mámleketler basshılıǵınıń wákilleri, dúnyalıq kólemdegi jetekshi ekspertler hám iri kompaniyalardıń basshıları qatnaspaqta.
Onda Ózbekstan atınan “Ózatom” agentliginiń direktorı Azim Ahmedxwjaev basshılıǵındaǵı delegaciya da qatnaspaqta.
Forum Rossiya atom sanaatınıń 80 jıllıǵı múnásibeti menen shólkemlestirilmekte. Atomdı tınısh jol menen basıp alıw tariyxı ashılıwlar hám jetiskenliklerge bay ekenligin atap ótiw kerek. 1954-jılı Obninsk qalasında dúnyadaǵı birinshi atom elektr stanciyası iske qosılıwı atom tarawın rawajlandırıwda áhmiyetli qádem bolǵan.
Atom tarawı payda bolǵannan keyingi dáslepki 15 jıl ishinde dúnyadaǵı birinshi tokamak reaktorı hám birinshi atom muz urıwshı kemesi iske qosılǵan.
“Rosatom” búgingi kúnde energetika, mashina qurılısı, qurılıs hám basqa da tarawlardaǵı aktivlerdi birlestirgen kóp tarmaqlı xolding. Onıń strategiyası tómen uglerodlı elektr energiyasın islep shıǵarıwdı rawajlandırıw, sonıń ishinde, samal energetikasın qollap-quwatlawdan ibarat.
Mámleketlik korporaciya mámlekette elektr energiyasın islep shıǵarıwda milliy jetekshi bolıp, AESlerdi qurıw boyınsha dúnyada birinshi orındı iyeleydi. Hár qıylı basqıshlarda 11 mámlekette 41 energetikalıq blok qurılmaqta. Korporaciyanıń jumıs tarawına innovaciyalıq yadrolıq emes ónim islep shıǵarıw, logistika hám Arqa teńiz jolın rawajlandırıw, ekologiyalıq joybarlardı ámelge asırıw da kiredi. Onıń quramında 450 den aslam kárxana hám shólkem bolıp, olarda shama menen 420 mıń adam jumıs alıp baradı.
Háptelik dawamında túrli mámleketlerdiń qánigeleri, ekspertleri bir qatar temalarda prezentaciyalar ótkeredi. Olardıń qatarında búgin “Ózatom” agentligi sessiya jumısında taraw boyınsha ámelge asırılıp atırǵan jetiskenliklerin kórsetedi. Esletip ótemiz, háptelik erteń de óz jumısın dawam ettiredi.

Nasiba Ziyodullaeva,
Muqimjan QODIROV (súwret), ÓzA