Xalıq deputatları Qońırat rayonlıq Keńesinde ÓzLiDeP deputatlıq toparınıń májilisi bolıp ótip, onda Ózbekstan Respublikası Prezidentiniń 2023-jıl 16-fevraldaǵı «2023-jılda qayta tikleniwshi energiya dereklerin hám energiya únemlewshi texnologiyalardı engiziwdi jedellestiriw ilajları haqqında» ǵı qararınıń orınlanıwı boyınsha “Aymaqlıq elektr tarmaqları” AJ Qońırat rayonlıq filialınıń esabatı tıńlandı.

Ilajda rayonlıq filial baslıǵı Orazǵali Muxanov bayanat jasap, deputatlarǵa 2025-jıldıń toǵız ayında ámelge asırılǵan jumıslar, áhmiyetli mashqalalar, jaqın keleshekke mólsherlengen rejeler haqqında maǵlıwmat berdi.

Prezident qararınıń 20-bántine muwapıq, rayon aymaǵında gidroelektr stanciyaların shólkemlestiriw, sociallıq, mámleketlik hám jeke menshik obektlerde quyash panellerin jedel engiziw ilajları baslap jiberildi. Atap aytqanda, 2025-jıldıń 9 ayı dawamında 24 sociallıq hám mámleketlik mákemelerde jámi 385 kVt quwatlılıqqa iye quyash panelleri ornatılıp, isbilermenlik subektlerine tiyisli 25 obektte 1326 kVt quwatlılıqtaǵı paneller jaylastırıldı hám 312 jeke menshik xojalıqta ulıwma quwatlılıǵı 1545 kVt bolǵan quyash panelleri ornatıldı.

“USTYURT SODIUM SULFATE” kárxanasında 1000 kVt quwatlılıqtaǵı quyash panelleri ornatılǵanı qayta tikleniwshi energiya dereklerin nátiyjeli engiziwdiń ayqın mısalı boldı. Qollanba energiya deregine ótkenge shekem kárxananıń elektr energiyası ushın aylıq qárejeti 360 million sumdı quraǵan bolsa, paneller ornatılǵannan soń bul muǵdar 230 million sumǵa túsip, ayına 130 million sum únemlengen.
Puqaralardıń belsene qatnasıwı da dıqqatqa ılayıq. Sonıń ishinde, Ájiniyaz máhállesinde jasawshı Nurken Aldamuratov óz úyine 50 kVt quwatlılıqtaǵı quyash panellerin ornatıp, basqalarǵa órnek bolmaqta. Bul arqalı onıń aylıq sap dáramatı 9,2 million sumdı quramaqta. Ámelge asırılǵan ilajlar nátiyjesinde jámi 4,7 million kVt/saattan aslam elektr energiyasınıń únemleniwine erisildi.

Sonday-aq, «Salıq» mobil qosımshasındaǵı «Quyashlı shańaraq» bólimi arqalı 2025-jılı 312 jeke menshik shańaraqtan quyash panellerin ornatıw boyınsha múrajatlar kelip túskeni atap ótildi. Barlıq múrajatlar jedellik penen kórip shıǵılıp, orınlawǵa qabıl etildi. Sonday-aq, artıqsha islep shıǵarılǵan elektr energiyasın satıw boyınsha tiyisli aldı-sattı shártnamaları dúzildi.

ÓzLiDeP deputatlar toparı ámelge asırılǵan jumıslardan qanaatlandı hám bul baǵdardaǵı jumıstı dawam ettiriw, ásirese, alıs hám kem támiyinlengen aymaqlarda alternativ energiya dereklerin keńnen engiziw zárúrligin atap ótti.

Prezident qararınıń orınlanıwı tek ǵana energiyanı únemlewdi arttırıw hám oraylasqan tarmaqlarǵa bolǵan júklemeni azaytıwǵa emes, al «jasıl ekonomika» nı rawajlandırıw, ekologiyalıq turaqlılıqtı támiyinlew hám xalıqtıń turmıs dárejesin jaqsılawǵa xızmet etpekte.

Qaraqalpaqstan xabar agentligi