Búgingi kúnde jaslardıń ekonomikalıq belsendiligi, sociallıq máselelerdegi qatnası hám innovaciyalıq pikirlew potencialı mámleket rawajlanıwınıń sheshiwshi faktorlarınan biri sıpatında qaralmaqta. Ásirese, jaslardı isbilermenlik tarawına tartıw, olardıń biznes ideyaların qollap-quwatlaw hám innovaciyalıq sheshimler jaratıwında járdem beriw áhmiyetli wazıypalardıń biri bolıp esaplanadı.

Usı maqsette Nókis qalasındaǵı Jaslar orayında «Innovaciyalıq isbilermenlik hám jaslar: Jańa áwlad imkaniyatları» atamasında seminar-trening shólkemlestirildi. Ilaj «Isbilermen jaslardıń 1000 innovaciyalıq joybarıǵ sheńberinde ámelge asırılıp, ÓzLiDeP Qaraqalpaqstan Respublikası Keńesi «Jaslar – keleshegimiz» qorınıń Qaraqalpaqstan filialı menen birgelikte ótkerildi.
Seminardıń tiykarǵı maqseti – jaslarǵa zamanagóy isbilermenlik tiykarların úyretiw, biznes reje dúziw, finanslıq esap-sanaqlardı júrgiziw, marketing strategiyaların qollanıw hám básekige shıdamlı ónim jaratıw boyınsha ámeliy kónlikpeler beriw bolıp esaplanadı. Sonıń menen birge, innovaciyalıq texnologiyalardan nátiyjeli paydalanıwǵa baylanıslı bilimlerdi sińdiriw arqalı jaslardı isbilermenlikke tayarlaw názerde tutılǵan.
Sheberlik sabaǵı formatında ótkerilgen ilajda turizm hám xızmet kórsetiw tarawlarında iskerlik alıp barıp atırǵan tájiriybeli isbilermenler Amina Bekchanova, Dilfuza Djembekova, Asqar Qalniyazov hám Nókis qalalıq Keńesiniń deputatları qatnasıp, jaslar menen ashıq pikirlesti. Olar bazardaǵı real talaplar, innovaciyalıq kózqaraslar hám bizneste birge islesiw imkaniyatları haqqında ámeliy maǵlıwmatlar berdi.
Ilajdıń jáne bir áhmiyetli tárepi jaslar tárepinen bildirilgen ideya hám baslamalardıń dodalanıwı boldı. Atap aytqanda, qatnasıwshı Miyrixan Utexanova milliy ayaq oyınlar tiykarında turistler ushın qısqa koncert baǵdarlamasın shólkemlestiriw ideyasın usındı. Bul usınıs isbilermenler tárepinen unamlı bahalandı hám joybardı ámelge asırıw boyınsha baǵdarlar kórsetip ótildi.
Jaslar tárepinen xalıqtıń turmıs dárejesi tómen bolǵan aymaqlarda mobil xızmet kórsetiw (shashtárezlik, tigiw-pishiw, texnika ońlaw), ekologiyalıq taza ónimler jetistiriw hám marketpleys arqalı satıw, «Mobil biznes orayları”n shólkemlestiriw, wálayat hám rayonlarǵa shıǵıp orınlardaǵı jaslarǵa bir mártelik biznes másláhátler, huqıqıy járdem, grant baǵdarlamaları haqqında maǵlıwmat beretuǵın avtobus yamasa arnawlı avtomashina beriw boyınsha usınıslar bildirildi.
Bul ideyalar ilajda dodalanıp, olardı ámelge asırıw boyınsha usınıslar berildi hám ayırım joybarlardı keleshekte qollap-quwatlaw maqsetinde dizimge alındı.
Seminar-trening juwmaǵında qatnasıwshılar ilajdı jaslar ushın jaratılǵan ámeliy maydan sıpatında bahaladı. Bunday ilajlar jas áwladtıń intellektuallıq potencialın rawajlandırıwǵa, olardı erkin qarar qabıl etiwge hám biznesti baslawǵa tayarlawda áhmiyetli qádem bolıp xızmet etpekte.

Amangul ESEMURATOVA ,
ÓzLiDeP Qaraqalpaqstan Respublikası Keńesi bólim baslıǵı