17-18-sentyabr kúni Franciyanıń Parij qalasında jaylasqan YuNESKOnıń bas shtab-kvartirasında, YuNESKO hám Ekonomikalıq Sheriklik hám Rawajlanıw Shólkemi (OECD) sherikliginde ótkerilgen «7 th Creativity Summit in Education» sammiti bolıp ótti.

Ilajda dúnyanıń kóplegen mámleketlerinen jetekshi pedagoglar, siyasatshılar, ilimiy izertlewshiler hám bilimlendiriw tarawı qánigeleri qatnastı.
Ótkerilgen bul abıraylı sammitke «El-yurt umidi» fondı stipendiantı, Ullı Britaniyanıń Glazgo universiteti studenti, jerlesimiz Nursulıw Qoqanova da qatnasıp, óziniń ámeliy tájiriybesi menen bólisti.
Ol óz shıǵıp sóylewinde bilimlendiriw procesinde hár bir oqıwshınıń individuallıǵın inabatqa alıw, olardıń qızıǵıwshılıq hám qábiletlerin anıqlaw, sheriklikte úyreniw (collaborative learning) ortalıǵın jaratıw zárúrligine ayrıqsha toqtap ótti.
Sammit juwmaǵında qatnasıwshılar global kólemde kreativlikti qollap-quwatlaytuǵın bilimlendiriw strategiyaları hám usınısların islep shıqtı.
-Bul sammittiń tiykarǵı maqseti – bilimlendiriw sistemalarında dóretiwshilikti rawajlandırıw, zamanagóy oqıtıw metodları arqalı oqıwshılarda sın kózqarastı hám kreativ pikirlewdi qáliplestiriw hám sanlı texnologiyalardan paydalanǵan halda innovciyalıq pedagogikalıq qatnaslardı engiziw máselelerin talqılawdan ibarat boldı, – deydi Nursulıw Qoqanova. – Sonday-aq, bul ilaj tek ǵana jańa bilimler alıw emes, al, xalıqaralıq kólemde birge islesiw baylanısların keńeytiwge múmkinshilik jarattı.
Álbette, jaslarımızdıń usınday sırt ellerdiń eń bir abıraylı universitetlerde oqıp bilim alıwı hám sammitlerge qatnasıwı, xalqımızdı quwanıshqa bólep, ósip kiyatırǵan jas áwladtıń erteńgi kúnge degen isenimin bekkemleydi dep oylaymız.

Adilbay Orazov,
Qaraqalpaqstan xabar agentligi sholıwshısı.