Elimizde 1-oktyabr – Muǵallimler hám ustazlar kúniniń keńnen belgileniwi, Prezidentimiz basshılıǵında muǵallimler hám ustazlardıń jámiyettegi ornın bekkemlew baǵdarında ámelge asırılıp atırǵan jumıslar ata-babalarımızdan usı kúnge shekem kiyatırǵan qádiriyatlarımızǵa únles boldı.

Sebebi, ustazına sheksiz húrmet kórsetetuǵın, onı ákesindey ullı kóretuǵın xalıqtıń áwladlarımız. Ata-babalarımız ustazlarǵa húrmet kórsetiwde bizge úlken ibrat qaldırǵan. Ilim alıwdan tısqarı ilim beriw mashaqatın tatıǵan qádirli ustazlarımızdı ulıǵlawdan shadlanamız. Olardıń húrmetin ornına qoyıwǵa, xızmetin orınlawǵa minnetlimiz.
Bıyılǵı jılı da Muǵallimler hám ustazlar kúni múnásibeti menen elimizdiń rawajlanıwı, ǵárezsizligimizdi jáne de bekkemlew, náwqıran hám bilimli jas áwladtı tárbiyalaw jolında jemisli miynet etip atırǵan bir topar taraw pidayıları húrmetke bólenip, ataqlar, orden hám medallar menen sıylıqlandı. Olardıń arasında Ellikqala rayonınan 18 jıllıq tájiriybege iye muǵallim, baslamashı isbilermen Jurabek Orazbaev ta bar.
Ol 1986-jılı Ellikqala rayonınıń “Qilchinoq” awıl puqaralar jıyınında injenerler shańaraǵında tuwılǵan. Tashkent mámleketlik texnika universitetin qızıl diplom menen pitkergennen soń 8 jıl dawamında Tórtkúl akademiyalıq liceyinde fizika páninen sabaq beredi. 2018-jıldan búgingi kúnge shekem Ellikqala rayonı 68-sanlı ulıwma orta bilim beriw mektebinde shaqırıwǵa shekemgi baslanǵısh tayarlıq páni muǵallimi bolıp jumıs islep kelmekte. Búgingi kúnde Jurabek Orazbaev hám ómirlik joldası Saida Qurbanbaeva ustazlar shańaraǵı sıpatında ózleri jasap atırǵan “Qoshqwra” máhálle puqaralar jıyınında ayrıqsha húrmetke iye. Úsh qız bir uldıń ádiwli anası Saida inglis tili páni muǵallimi bolıp, oǵan Xalıq bilimlendiriw ministri fondınan úsh márte, tájiriybe arttırıw attestaciya testlerinde joqarı ball toplaǵanı ushın aylıǵınıń 70 procenti muǵdarındaǵı arnawlı ústemeler belgilengen.
J.Orazbaev 2020-jılı 250 orınlı “Sarabiy” oqıw orayın ashadı. Oraydıń tolıq jumıs baslawı ushın derlik 800 million sum qarjı jumsaldı. Barlıq zárúrli sharayatlar jaratılǵan orayda ana tili hám ádebiyatı, shet tilleri, ximiya, biologiya, matematika, fizika, tariyx, huqıqtanıw baǵdarlarında baslawısh, orta hám pitkeriwshi klass oqıwshıları, sonday-aq, shet tilleri boyınsha xalıqaralıq imtixan sistemalarınan alınatuǵın sertifikatlar ushın tayarlıqlar shólkemlestirilip, rayonda qánigelerdi tayarlaw sistemasın jetilistiriwge xızmet etpekte. Bul oqıw orayında rayondaǵı 1, 5, 8, 28, 49, 54, 68-sanlı ulıwma orta bilim beriw mektepleriniń 1-11-klasslarında bilim alıp atırǵan 250 oqıwshı bilim dárejesin arttırıp kelmekte. Sonnan hár jılı 200 ge shamalası joqarı oqıw orınlarına oqıwǵa kiredi. Búgingi kúnge shekem orayda tayarlanǵan mıńnan aslam abiturientler JOO nıń studenti bolıw baxtına eristi.
Orayda ayına bir márte usı kúnge shekem ótilgen temalar boyınsha test alınadı hám eń joqarı ball toplaǵan oqıwshılardıń keyingi aydaǵı tólemlerine 50 procent shegirme beriledi. Oqıwshı tayarlanıp júrgen páninen 30 sorawdan barlıǵına juwap berse, sol ayı ushın tólem alınbaydı. Sonday-aq, bir ay dawamında bilim dárejesi boyınsha joqarı nátiyjeler kórsetken oqıwshınıń oqıwǵa kiremen degenge shekemgi tayarlıqları oqıw orayınıń esabınan alıp barıladı. Oqıwǵa kirgennen keyin tólemdi ámelge asırıw imkaniyatı beriledi.
Elimizdiń pidayı perzenti, bilim beriwge qushtar, saqawatlı isbilermenniń milliy bilimlendiriwge qosıp atırǵan salmaqlı úlesi múnásip qádirlenip, 1-oktyabr – Muǵallimler hám ustazlar kúni múnásibeti menen mámleketlik sıylıq – “Shuhrat” medali menen sıylıqlandı. Ol tek bilimlendiriw tarawında ǵana emes, al, jámiyetimizdiń rawajlanıwı jolında ámelge asırıp atırǵan qayırlı isleri menen de tanılǵan. Atap aytqanda, orayda onıń baslaması menen máhálledegi kem támiyinlengen, baǵıwshısın joǵaltqan shańaraqlardıń perzentleri, jetim, shańaraǵında mayıplıǵı bolǵan balalar 20 procentten 100 procentke shekem shegirmeler menen oqıtıladı. Ekshembi kúnleri olarǵa qosımsha tegin sabaqlar ótiledi. Sonday-aq, usınday shańaraqlarǵa turaqlı túrde materiallıq jaqtan járdem beriledi. Jaqsı miynet etken muǵallimlerge jıl aqırında sırt elge yamasa Ózbekstan boylap shańaraǵı menen dem alıp keliwi ushın jollamalar alıp beriledi.
Áhmiyetlisi, ol bıyılǵı jılı “Paxtachi” máhállesinde 1,5 milliard sum qarjı esabınan “Sarabiy” oqıw orayınıń 220 orınlı filialın ashtı. Orayda 12 muǵallimniń bántligi támiyinlengen.
– Jurabek Orazbaev rayonda bilimlendiriw tarawın rawajlandırıwǵa jan-táni menen xızmet etip atırǵan pidayı pedagog, – deydi Ellikqala rayonlıq Mektepke shekemgi hám mektep bilimlendiriwi bólimi baslıǵı Shuxrat Xalmuratov. – Onıń “Sarabiy” oqıw orayı rayon jaslarınıń oqımıslı bolıp, intellektuallıq jaqtan rawajlanıwına xızmet etip kelmekte. Orayda tálimniń júdá talapshańlıǵı hám básekige shıdamlılıǵı, balalardı joqarı oqıw orınlarına, abıraylı univesitetlerge maqsetli tayarlawǵa ayrıqsha itibar qaratıwı, joqarı bilimlendiriw menen úzliksiz integraciyalasqanı dıqqatqa ılayıq.
– Oqıw orayın ashpastan aldın Rossiya Federaciyasına barıp, jumıs islep qaytıw niyetinde júr edim. Tórtkúl akademiyalıq liceyinde jumıs baslaǵanımda oqıwshılardıń fizika pánine qızıǵıwshılıǵın kórip, repetitor bolıw pikiri tuwıldı. Sonnan keyin sırt elge ketiw pikirinen qayttım. Maqsetim ózgerdi – xalqımnıń perzentlerin oqımıslı etip, tuwılıp ósken elime paydamdı tiygiziw bas maqsetime aylandı, – deydi J.Orazbaev. – Búgingi kúnde elimizde baslamashı jaslar ushın barlıq imkaniyatlar jaratılǵan. Bul imkaniyatlardı qádirlew, olardan nátiyjeli paydalanıp, elimniń rawajlanıwına óz úlesimdi qosıw minnetim, dep esaplayman. Usı jol menen Ózbekstanımızda muǵallimlerge qaratılıp atırǵan joqarı itibarǵa juwap retinde ele de jaqsıraq xızmet etiwge, berilgen isenimdi aqlawǵa háreket etemen.
Bir hárip úyretken adam da ustaz bolıp tabıladı. Olar ózleri júrgen joldıń oylı-bálentin jaqsı biledi hám shákirtlerin eskertip baradı. Olar tayar tájiriybe mektebi. Ustazlar shın mániste ǵáziyne, haqıqıy baylıq esaplanadı.
Ustaz sebepli adamlar durıs joldı tabadı, olardıń sharapatı menen mashqalalardan aman shıǵadı. Alla muqaddes qılǵan insanlar arasında ustazlar da bar ekenligin umıtpawımız tiyis. Alla ilim qádirin qánshelli bálent etken bolsa, ilim beretuǵın ustazlardı da sonday ullı dárejege kóterdi. Ata-babalarımız perzentlerin bir óner úyreniwi ushın ustazlarǵa alıp kelgende “Eti sizdiki, súyegi bizdiki”, dep biykarǵa aytpaǵan. Ustazdıń shákirtte haqısı kóp. Mine usınday ibratlı dástúrlerimiz dawamlı bolsın.

M.Pirnazarova,
Qaraqalpaqstan xabar agentliginiń xabarshısı