«Ózbekneftgaz» AJ basqarıwı baslıǵı Bahodirjon Siddiqov hám Qubla Afrikanıń “Sasol” kompaniyasınıń atqarıwshı vice-prezidenti doktor Sarushen Pillay basshılıǵındaǵı delegaciya aǵzaları arasında ushırasıw ótkerildi.

Onda táreplerdiń birge islesiwi haqqında sóz boldı.

Atap ótilgenindey, “Sasol” kompaniyası “Uzbekistan GTL” joybarınıń tiykarǵı licenziyalarınan biri esaplanadı. Usı birge islesiw sheńberinde sintetikalıq janar may islep shıǵarıw zavodı tolıq joybarlıq quwatlılıqqa shıǵarıldı.
“Uzbekistan GTL” zavodınıń jumısı menen jaqınnan tanısqan “Sasol” kompaniyası delegaciyası usı zavod búgingi kúnde tolıq quwatlılıq penen islep atırǵanına hám joqarı nátiyjelilikke erisilip atırǵanına ayrıqsha áhmiyet qarattı. Miymanlar mámleket tárepinen óz waqtında berilgen qollap-quwatlaw sebepli “Ózbekneftgaz” AJ mámleket tariyxında birinshi márte sintetikalıq suyıq janar may islep shıǵarıwǵa eriskenin atap ótti.
“Sasol” kompaniyası joybardıń tiykarǵı licenziarı sıpatında Jámiyetti hár tárepleme texnikalıq jaqtan qollap-quwatlaw, sonday-aq, ónim islep shıǵarıw ushın zárúr bolǵan katalizatorlardı uzaq múddetli jetkerip beriwge tayar ekenligin bildirdi.
Jámiyet málimleme xızmetiniń xabarına bola, tárepler basqa da baǵdarlarda birge islesiwdi jolǵa qoyıw, sonıń ishinde, ideyadan ámeliy orınlawǵa shekemgi bolǵan jańa investiciyalıq joybarlardı islep shıǵıw hám tastıyıqlaw processlerin shólkemlestiriw máselelerin dodaladı.
Ushırasıw juwmaǵında atap ótilgenindey, tárepler turaqlı aviaciya janar mayın islep shıǵarıw tarawındaǵı birge islesiwdi jáne de kúsheytedi.

N.Ziyodullaeva,
ÓzA