Ózbekstan Respublikası Prezidenti Shavkat Mirziyoev Birlesken Milletler Shólkemi Bas Assambleyasınıń 80-yubiley sessiyasınıń ilajlarında qatnasıw ushın 20-24-sentyabr kúnleri ámeliy sapar menen Nyu-York qalasında boldı.

Mámleketimiz basshısı 24-sentyabr kúni AQSh Kongressi aǵzası, Wákiller palatasındaǵı “Ózbekstan menen birge islesiw boyınsha kokus” baslıǵı Trent Kelli hám Missisipi shtatı Milliy gvardiyası sárkardası, general-mayor Bobbi Jindi qabılladı.
Ózbekstan – AQSh strategiyalıq sheriklik qatnasıqların bunnan bılay da keńeytiw, sonıń ishinde, parlamentleraralıq sóylesiwdi bekkemlew máseleleri kórip shıǵıldı.
Parlamentleraralıq sóylesiw hám almasıwlar jedel rawajlanıp atırǵanı qanaatlanıwshılıq penen atap ótildi. Kongress Senatı hám Wákiller palatasınıń aǵzaları Ózbekstanǵa turaqlı sapar etpekte. “Ózbekstan menen birge islesiw boyınsha kokus” jedel islemekte, onıń quramı keńeymekte. Kongresste hár jılı eki mámleket parlamentleri arasındaǵı birge islesiwdi bekkemlewge xızmet etip atırǵan Ózbekstan kúnleri ótkerilip kelinbekte.
AQShtıń Missisipi shtatı menen sawda-ekonomikalıq hám mádeniy-gumanitarlıq baylanıslarǵa joqarı baha berildi.
Ózbekstan menen AQSh arasındaǵı strategiyalıq sheriklikti bunnan bılay da keńeytiw, joqarı dárejede erisilgen kelisimlerdi ámelge asırıwda Kongresstiń qollap-quwatlawı áhmiyetli ekeni atap ótildi.
Sóylesiw juwmaǵında jaqında Kongress delegaciyası hám Missisipi shtatı isbilermenleriniń Ózbekstanǵa saparların shólkemlestiriwge kelisip alındı.
Ózbekstan Respublikası Prezidenti Shavkat Mirziyoev AQShqa ámeliy saparın juwmaqlap, dástúrge bola, usı mámlekette miynet etip hám jasap atırǵan watanlaslarımız, sonday-aq, AQShtıń abıraylı universitetlerinde bilim alıp atırǵan “El-yurt umidi” qorınıń stipendiantları menen ushırastı.
Rásmiy emes ortalıqta ótken qızǵın sáwbetlesiw dawamında Jańa Ózbekstandaǵı reformalardı ámelge asırıwǵa baylanıslı máseleler, atap aytqanda, olardı jedel alǵa qoyıwda watanlaslar hám olardı birlestiriwshi shólkemlerdiń qatnasıwı dodalandı.
Ushırasıwda tabıslı isbilermenlik jumısın jolǵa qoyǵan watanlaslar hám jaslar arasında pikirlesiw maydanın jaratıwǵa qaratılǵan “Watanlaslardıń xalıqaralıq biznes marafonı”na start berildi.
Qatnasıwshılar Ózbekstan hám AQSh arasındaǵı sawda-ekonomikalıq, investiciyalıq, ilimiy hám bilimlendiriw baylanısların keńeytiw hám bekkemlew, milliy ekonomikanıń tiykarǵı tarawlarına AQShtıń aldınǵı texnologiyaların engiziw, medicina, transport hám logistika tarawlarında innovaciyalardı alǵa qoyıw, mámleketimizde marketpleyslerdi rawajlandırıw boyınsha óz usınısların bildirdi.
Mámleketimiz basshısı jıynalǵanlarǵa Watanımızdıń rawajlanıwına qosıp atırǵan úlesi ushın minnetdarshılıq bildirip, bildirilgen barlıq usınıs hám baslamalar mámleketimizdiń ministrlikleri hám uyımları tárepinen puqta úyrenip shıǵılatuǵının, eń perspektivalıları bolsa ámeliyatqa engiziletuǵının atap ótti.
Ózbekstan Prezidenti AQShta “El-yurt umidi” stipendiantlarınıń sanı 500 den artqanına ayrıqsha itibar qarattı. Qábiletli jaslardı qollap-quwatlaw, olardıń bilim hám tájiriybesin watanında qollanıw ushın imkaniyat jaratıw mámleketlik siyasattıń tiykarǵı baslı baǵdarlarınan biri ekenin atap ótti.
Prezident Shavkat Mirziyoev studentlerge oqıwda hám keleshektegi kásiplik jumıslarında tabıslar tilep, mámleketimiz jaslardıń baslamalarına bárqulla ashıq ekenligin hám olardı hár tárepleme qollap-quwatlawǵa tayar ekenin atap ótti.
Óz gezeginde, ushırasıw qatnasıwshıları Ózbekstan jetekshisine sırt eldegi watanlaslar hám jaslarǵa kórsetilip atırǵan itibar, olardıń potencialın júzege shıǵarıw ushın jaratılıp atırǵan sharayatlar hám imkaniyatlar ushın minnetdarshılıq bildirip, Watanımızdıń rawajlanıwına jáne de kóbirek úles qosıwǵa tayar ekenligin bildirdi.
Sonıń menen Ózbekstan Respublikası Prezidenti Shavkat Mirziyoevtiń Amerika Qurama Shtatlarına ámeliy saparı juwmaqlandı.

ÓzA