Erte báhárde 4400 gektar jerge shigit sepken Qaraózek rayonı diyqanları, bir tegis ónip shıqqan ǵawasha nállerine agrotexnikalıq qádelerge say tárbiya berip, onnan mol ónim jetistiriwge eristi.

Házirgi kúnleri rayonnıń barlıq awıllarındaǵı paxta atızlarında jıyın-terim isleri qızǵın dawam etip, aldınǵı fermer xojalıqları belgilengen rejeni artıǵı menen orınlawǵa miyasar bolmaqta. Usınday aldınǵı xojalıqlardıń biri akademik S. Kamalov awıl puqaralar jıyınında jaylasqan Omar Sapaev basqarǵan «Qaraózekli xoja ata» fermer xojalıǵı bolıp tabıladı.
Atap aytqanda, olar 26 gektar jerde jetistirilgen ǵawashadan 56 tonna ónim jetistirip, shártnamadaǵı rejeni artıǵına orınlap shıqtı.
Bul aldınǵı fermer xojalıǵı aǵzaların qolǵa kirgizgen tabısı menen qutlıqlaw hám paxta terimine kelgen shápik qollı terimshilerdi xoshametlew maqsetinde, Qaraqalpaqstan Respublikası Joqarǵı Keńesiniń komitet baslıǵı Sharapat Ótemisov hám Qaraózek rayonı hákimi Anvar Baymuratovlar xojalıq atızında bolıp, terimshiler menen ushırastı hám olardıń hal-jaǵdayları menen tanıstı.
Awıl turǵınlarına harmasın aytıp, awıl xojalıǵında pidayı miynet etip atırǵan xojalıq aǵzaları hám shápik qollı terimshilerge estelik sawǵaların tapsırdı.
Bunnan soń ilaj qatnasıwshılarına rayonlıq mádeniyat bólimi xızmetkerleri tárepinen yoshlı koncert baǵdarlaması qoyıp berilip, bul olarǵa ózgeshe zawıq baǵıshladı.

Adilbay Orazov,
Qaraqalpaqstan xabar agentligi sholıwshısı