Qaraqalpaqtan Respublikası Pedagogikalıq sheberlik orayında “Renessans ustazları” pedagogikalıq sheberlik yarmarkası ótkerildi. Ilajdıń tiykarǵı maqseti – bilimlendiriw procesinde ustazlardıń orın hám abırayın arttırıw, aldınǵı tájiriybelerdi keń jámiyetshilikke usınıw hám bilimlendiriwdiń sapasın bunnan bılay da arttırıw bolıp tabıladı.

Yarmarka sheńberinde oqıw-metodikalıq ónimler kórgizbesi, STEAM, IT hám sanlı bilimlendiriw baǵdarındaǵı jańalıqlar prezentaciyası, kreativ sabaq islenbeleri hám innovaciyalıq kózqaraslar tiykarında tayarlanǵan sheberlik sabaqları hám treningler shólkemlestirildi.
Ilajda Oray direktorı Venera Bekmuratova shıǵıp shóylep, yarmarkanıń tiykarǵı maqseti, ustazlardıń tájiriybesi hám dóretiwshilik izlenislerin keń jámiyetshilikke usınıw, zamanagóy bilimlendiriw procesinde pedagoglardıń abırayın jáne de arttırıwdan ibarat ekenin atap ótti.
Ilaj dawamında pedagoglardıń jańa qollanbaları, nátiyjeli metodikalıq qollanbalar hám dóretiwshilik izlenisleri keńnen kórsetildi.
-Yarmarka ustazlardıń bilim hám tájiriybesin keń jámiyetshilikke usınıw, olardıń kásiplik potencialın arttırıwda áhmiyetli maydan wazıypasın atqardı. Qatnasıwshılar tájiriybe almasıw, bilimlendiriw tarawında engizilip atırǵan zamanagóy metodlardı úyreniw arqalı onı óz jumıslarında qollanıwǵa tiykar boları sózsiz, – deydi yarmarka qatnasıwshısı pedagog Perdexan Salieva.
Yarmarka sheńberinde zamanagóy bilimlendiriwdiń ajıralmas bólegi bolǵan STEAM, IT hám sanlı bilimlendiriw baǵdarındaǵı eń sońǵı jańalıqlar kórsetilip, oqıtıwshılar ushın jańasha qatnaslar hám nátiyjeli metodlar usınıs etildi. Yarmarkada kreativ sabaq islenbeleri, sheberlik sabaqları hám treningler ótkerilip, ustazlardıń tájiriybesi hám potencialı keń jámiyetshilikke usınıldı.
Ilajda tıńlawshılar tárepinen jaratılǵan túrli innovaciyalıq, metodikalıq hám didaktikalıq materiallar, qol miyneti úlgileri jáne pedagogikalıq sheberlikti bayıtıwǵa xızmet etetuǵın dóretiwshilik qollanbalar kórsetildi.
Ilaj juwmaǵında yarmarka ustazlardıń kásiplik potencialın hám bilimlendiriwdiń sapasın arttırıw menen innovaciyalıq kózqaraslardı ǵalaba en jaydırıwǵa xızmet etkeni ayrıqsha atap ótildi.
Yarmarkada belsene qatnasqan ustazlar hár qıylı nominaciyalar boyınsha sertifikatlar menen sıylıqlandı.

G.Turdıshova, Qaraqalpaqstan xabar agentligi