Elimizdiń baylıǵı bolǵan «aq altın» dı sepsitpey jıynap alıw búgingi kúnniń áhmiyetli wazıypalarınan biri esaplanadı. Bunıń ushın fermerlerge kómekke barıp, óz járdemin tiygizip atırǵan xalqımız pidákerlik penen miynet etpekte. Bul ilajlarda jumıssız puqaralardıń bántligi támiyinleniwi menen birge nuraniy ata-apalarımız da paxta atızlarında bolıp, ózleriniń qol kómegin bermekte.

Solar qatarında Nókis rayonınıń nuraniyleri de “Qırantaw” awıl puqaralar jıyını aymaǵında jaylasqan “Tumaris Madina” fermer xojalıǵında ótkerilip atırǵan paxta teriminde belsene qatnastı.
Elimizde jas áwladtı miynet súygishlik ruwxında tárbiyalaw, kekselerdi qádirlew hám jámiyette olardıń ornın jáne de bekkemlew maqsetinde ámelge asırılıp atırǵan jumıslardıń nátiyjesi sıpatında búgingi ilaj ayrıqsha áhmiyetke iye boldı. Terim procesinde Nókis rayonında jasawshı miynet veteranları, nuraniyler belsene qatnasıp, jaslarǵa haqıyqıy úlgi kórsetti.
Bunday ilajlar, álbette, jaslar hám kekseler arasındaǵı óz-ara awızbirshilikti bekkemlewge xızmet etedi. Bunnan tısqarı ruwxıy-aǵartıwshılıq hám miynetti úgit-násiyatlaw ilajları arqalı jaslarda Watanǵa sadıqlıq, miynetke muhabbat, úlkenlerge húrmet sezimleri jáne de kúsheyedi.
Sonday-aq, búgingi kúnde fermer xojalıqları hám jergilikli jámáátler arasındaǵı birge islesiwdi bekkemlew, jámiyetshilikti ulıwma maqset jolında birlestiriwde de ayrıqsha áhmiyetke iye.

Qaraqalpaqstan xabar agentligi