Sońǵı jılları húrmetli Prezidentimiz hám respublika húkimeti tárepinen sport tarawın rawajlandırıwǵa qaratılǵan ayrıqsha itibar hám qollap-quwatlawlar nátiyjesinde sportshılarımız xalıqaralıq jarıslarda jeńimpazlıqtı qolǵa kirgizip, mámleketimiz bayraǵın bálentlerde jelbiretpekte.

Sportshılarımızdıń bunday joqarı shoqqılardı iyelewinde elimiz aymaqlarında jaylasqan sport mektepleriniń tutqan ornı ayrıqsha bolıp tabıladı. Sebebi, bul mekteplerde islewshi ustaz-trenerler tárepinen kishkene balalarımızǵa sporttıń dáslepki sırları úyretilip, olarǵa durıs jol-joba beriledi.
Taxtakópir rayonında jaylasqan sport mektebi de usınday úlgili bilimlendiriw dárgaylarınıń biri bolıp, búgingi kúni bul jerde sporttıń 17 túri boyınsha 1582 sportshı tálim-tárbiya almaqta. Atap aytqanda, sport mektebinde aymaq jasları sporttıń futbol, voleybol, basketbol, gandbol, kórkem gimnastika, sport gimnastikası, boks, stol tennisi, badminton, dzyudo, qol urısı, shaxmat, jiu-jitsu, jeńil atletika, awır atletika túrleri menen shuǵıllanıp kelmekte. Olarǵa 43 trener-oqıtıwshılar ustazlıq etip kiyatır.
– Elimizde sportqa qaratılıp atırǵan joqarı itibar hám ǵamqorlıqtıń nátiyjesinde, mámleketimiz dúnyadaǵı eń iri sport derjavasına aylandı desem jańılıspaǵan bolaman, – deydi mektep direktorı Bekbergen Jarımbetov.- Sportshılarımızdıń Tokio Olimpiadası, Aziya oyınları, Islam tilekleslik oyınları, Aziya hám Jáhán chempionatlarında kórsetip atırǵan nátiyjeleri bul sózimdi tolıq tastıyıqlaydı. Sonlıqtan búgingi kúni qaysı sport túrinen bolmasın, Qaraqalpaqstan hám Ózbekstan kóleminde ótkeriletuǵın jarıslarda sportshılardıń jeńiske erisiwi qıyın bolmaqta. Sonıń ushın mektebimiz trenerleri oqıwshılar menen tıǵız birge islesip, oqıw-shınıǵıwlarına úlken itibar qaratpaqta.
Shınında da taxtakópirli sportshılar búgingi kúnniń talabınan kelip shıǵıp, zamanǵa say nıq qádemler taslamaqta. Bunı olardıń hár qıylı sport jarıslarında qolǵa kirgizip atırǵan tabısları ayqın tastıyıqlaydı. Atap aytatuǵın bolsaq, usı jıldıń 22-29-mart kúnleri Tashkent qalasında, 3-8-aprel kúnleri Nókis qalasında 15 hám 19 jastaǵı komandalar arasında voleybol boyınsha ótkerilgen Ózbekstan chempionatlarında mektep tárbiyalanıwshıları Esen Ańsatbaev hám Azizbek Nuratdinovlardıń Qaraqalpaqstan saylandı komandası quramında gúmis hám qola medallardı, 17-20-aprel kúnleri Jizzaq wálayatında ózbek jawıngerlik óneri boyınsha ótkerilgen Aziya kuboginde Niyetbay Seyilxanovtıń gúmis, Aydana Alijanova hám Azima Shalabaevalardıń qola, 23-27-aprel kúnleri Samarqandta jiu-jitsu boyınsha ótkerilgen Ózbekstan chempionatında Nilufar Qaypanovanıń altın, Gúldana Ótemisovanıń gúmis, Jaynagúl Keńesbaeva, Mehriban Jabbarbergenova, Húrziya Paxratdinova, Nurjanat hám Saltanat Yusupovalar, Periyzat Tilewbergenovalardıń qola, 20-23-dekabr kúnleri Tashkentte jiu-jitsu boyınsha ótkerilgen Ózbekstan kuboginde Tursınay Boranbaeva, Mehriban Jabbarbergenova hám Húrziya Paxratdinovalardıń altın, Nurjamal Jumabekova, Feruza Ismailovalardıń gúmis, Lázzet Jabbarbergenova, Gúlbanu Sharapatdinova, Aygerim Begdullaeva, Gúlbanu Mambetniyazova, Layla Bekturǵanova, Barno Táńirbergenova hám Abdimansur Qádirbergenovlardıń qola, 12-16-fevral kúnleri qol urısı boyınsha Tashkent qalasında ótkerilgen Ózbekstan chempionatında Aqbota Naǵashbaevanıń qola, Ushu boyınsha Ózbekstan chempionatında Dáwlet Quwanıshbaev, Ádilbek Madreymov, Nurtas Arepbaev, Nazar Nasirovlardıń gúmis, Raxim Janadilov, Muhammed Nasirov, Jangeldi Ayımbetovlardıń qola medalı, 1-8-mart kúnleri Sırdárya wálayatında voleybol boyınsha ótkerilgen Ózbekstan chempionatında Aysulıw Tastaybekovanıń gúmis, 27-29-avgust kúnleri Tashkent wálayatında voleybol boyınsha ótkerilgen Ózbekstan kuboginde Ayjan Serekeevanıń qola medal, 14-20-sentyabr kúnleri kúnleri qol urısı boyınsha Xorezm wálayatında ótkerilgen Ózbekstan kuboginde Juldız Matekeevalardıń altın, Aqbota Naǵashbaevanıń gúmis medallardı jeńip alıwı mektepte jumıs islep atırǵan trenerlerdiń pidayı miynetleriniń jemisi desek boladı.
– Sońǵı jılları Respublika húkimeti hám rayon basshılarınıń qollap-quwatlawı menen mektebimizdiń materiallıq-texnikalıq bazasın jańalawǵa da ayrıqsha itibar qaratılıp, bul baǵdarda kóplegen unamlı isler ámelge asırılmaqta, – deydi mektep direktorı Bekbergen Jarımbetov.- Atap aytqanda, mektebimizge «Dáwqara» sport kompleksi qurıp berilgen bolsa, 2024-jılı «Ashıq byudjet» portalınan 1 mlrd 360 mln sumlıq qarjı jeńip alınıp, sport mektebine kapital ońlaw jumısları júrgizildi. Sonday-aq, 2024-jıldıń «Ashıq byudjet»tiń ekinshi máwsiminde jáne de 1 mlrd 359 mln sumlıq qarjı jeńip alınıp, oǵan mektebimiz ushın zárúr bolǵan sport ánjamları, kompyuter, audio hám video texnikaları satıp alındı. Házirgi kúnleri jas sportshılarımız bunnan nátiyjeli paydalanıp, oqıw shınıǵıwların ótkerip kelmekte.
Álbette, mektep tárbiyalanıwshılarınıń bunday jaqsı nátiyjelerdi qolǵa kirgiziwinde ustaz-trenerlerdiń atqarıp atırǵan xızmetleri ayrıqsha bolıp tabıladı. Olar arasında Salamat Óteniyazov, Qállibek Jamǵırbaev, Gúlnaz Qayıpbekova, Jayna Esimova, Dáwletali Usaqov, Rufat Abdijalilov hám Aybek Jubatqanovlardıń ózleriniń pidayılıqların kórsetpekte.

Adilbay Orazov,
Qaraqalpaqstan xabar agentligi sholıwshısı