Sońǵı jılları Qaraqalpaqstan Respublikası Densawlıqtı saqlaw ministrligi tárepinen medicina tarawında xalıqaralıq birge islesiwlerdi jolǵa qoyıw hám sırt el tájiriybesin elimizge alıp kiriw boyınsha bir qatar unamlı ilajlar ámelge asırılıp, dúnyadaǵı eń belgili medicinalıq klinikaları menen sheriklik baylanısları ornatıldı.

Mine, usınıń nátiyjesinde elimizde sırt eldiń tájiriybeli shıpakerleri tárepinen biypul medicinalıq tekseriwler, quramalı operaciyalar ámelge asırılmaqta.
23-sentyabr kúni usınday ámeliy ilajlardıń dawamı sıpatında Qaraqalpaqstan Respublikası Densawlıqtı saqlaw ministrliginiń baslaması menen Nókis qalasında medicina tarawı eń jaqsı rawajlanǵan mámleketlerdiń biri Hindstannıń Deli qalasındaǵı «BLK-Max» emlewxanasınıń tájiriybeli neyroxirurg-nevropatolog, gepatolog-gastroenterolog, onkolog hám ortoped-travmatolog shıpakerleri tárepinen nawqaslar biypul medicinalıq tekseriwlerden ótkerilip, olarǵa zárúr bolǵan medicinalıq másláhátler berildi.
Bul ilaj búgin de Respublikalıq qánigelestirilgen onkologiya hám radiologiya ilimiy-ámeliy medicinalıq orayınıń Qaraqalpaqstan filialı hám de O.Xalmuratov atındaǵı Respublikalıq kóp tarmaqlı medicina orayınıń poliklinikasında ámelge asırıladı.

Qaraqalpaqstan xabar agentligi