Búgingi kúnde paxta atızlarında terim mashinaları jumıs baslap, fermer xojalıqlarınıń awırın jeńillestirmekte. Beruniy rayonındaǵı Alǵabas aymaǵında jaylasqan “Azat Gulimbaev” fermer xojalıǵı tárepinen 92 gektar maydanda paxta egilgen bolıp, bul paxta maydanlarınan 346 tonna paxta shiyki zatın jetistiriw rejelestirilgen. Fermer xojalıǵı tárepinen Túrkiya mámleketinde islep shıǵarılǵan, yaǵnıy qatar araları 60×60 sxemada paxta teretuǵın “CANSA” markalı paxta teriw mashinası lizing tiykarında satıp alınǵan. Házirgi kúnde fermer xojalıǵında paxta teriw mashinası arqalı jıyın-terim jumısları ámelge asırılmaqta. Bul bolsa hám waqıttan, hám qarjıdan únemlew menen birge zúráátti suwıq kúnlerge qaldırmastan jıynap alıwǵa úlken járdem beredi.
Uluǵbek aymaǵında jaylasqan “Zafar Sabir” fermer xojalıǵı tárepinen 46 gektar maydanda paxta egilip, usı paxta maydanlarınan 207 tonna paxta shiyki zatı jetistirildi. Bul fermer xojalıǵı rayonnıń alıs aymaqlarında jaylasqan bolıp, jetistirilgen paxta shiyki zatı Qıtay mámleketinde islep shıǵarılǵan “BOShIRANG” markalı paxta teriw mashinası arqalı terip alınbaqta. Házirgi kúnde Beruniy rayonına 9 paxta teriw mashinası alıp keliniwi rejelestirilgen bolıp, sonnan altawı fermer xojalıqlarına tiyisli esaplanadı.

Qaraqalpaqstan xabar agentligi