Jerge baylanıslı qatnasıqlarda teńlikti támiyinlew, jerge bolǵan huqıqlardı isenimli qorǵaw, awıl xojalıǵı ónimlerin jetistiriwshi, qayta islewshi hám satıwshı subektler arasındaǵı qatnasıqlardıń huqıqıy tiykarın bekkemlew baǵdarında bir qatar reformalar ámelge asırılmaqta.

Sonıń menen birge, búgingi kúnde isbilermenlik subektleri, fermer, diyqan xojalıqlarınıń óz tovarları (jumısları, xızmetleri) nıń bahasın erkin belgilewdi, olardıń jumısına ayırım jergilikli atqarıw hákimiyatı uyımları tárepinen aralasıwdıń aldın alıw boyınsha nızamshılıqtaǵı normalardı bekkemlew zárúrligi júzege kelmekte.
Usı maqsette Jınayat hám Hákimshilik juwapkershilik haqqındaǵı kodekslerge kirgizilip atırǵan qosımshalarǵa bola, tovarlar (jumıslar, xızmetler) hám finanslıq qarjılardıń erkin háreketleniwine hám (yamasa) realizaciyalanıwına aralasqanlıq yamasa tosqınlıq etkenlik ushın juwapkershilik belgilenbekte.
Bul Oliy Majlis Nızamshılıq palatasınıń bir topar deputatları tárepinen nızamshılıq baslaması huqıqı tiykarında islep shıǵılǵan nızam joybarında óz kórinisin tappaqta. Awıl xojalıǵına mólsherlengen jer uchastkasınan paydalanıw menen baylanıslı qatnasıqlardı jetilistiriwge qaratılǵan bul nızam joybarı deputatlar hám qánigelerdiń qatnasıwında dáslepki tárizde kórip shıǵıldı.
Atap ótilgenindey, Jer kodeksi, “Fermer xojalıǵı haqqında”ǵı nızamǵa awıl xojalıǵına mólsherlengen jer uchastkasınıń ijarashısı ijara shártnaması boyınsha ózine ijaraǵa berilgen eki yamasa onnan aslam jer uchastkalarınan biri yamasa bir neshewi boyınsha óz huqıqları menen minnetlemelerin basqa shaxsqa ótkeriwi (bólip-bólip qayta ijaraǵa beriwi) názerde tutılmaqta.
Sonıń menen birge, fermer xojalıǵı baslıǵı isbilermenlik jumısı menen shuǵıllanıwǵa jol qoyılmaytuǵın jumısqa qabıl etilgen jaǵdayda, fermer xojalıǵın óz shańaraq aǵzalarınan birine beriwi múmkin ekenligi usınıs etilmekte.
Nızam joybarı awıl xojalıǵına mólsherlengen jer uchastkalarınan nátiyjeli paydalanıw, ónimler jetistiriwshilerdiń nızamlı máplerin qorǵaw hám olardıń finanslıq imkaniyatların arttırıwda áhmiyetli orın tutadı. Deputatlar bul hújjet joybarın jetilistiriw boyınsha óz pikir-usınısların bildirdi.

Muhtarama Komilova, ÓzA