Házirgi kúnleri respublikamızdaǵı paxtashılıqqa qánigelesken klasterler hám fermer xojalıqları atızlarında paxta jıyın-terimi jumısları qızǵın alıp barılmaqta. Quwanıshlı tárepi sonda, bul jumıslarǵa aymaqlarda jasawshı jámlespegen jaslar da belsene qatnaspaqta. Álbette, olardıń islegen bul xızmetleri respublika húkimeti hám rayon hákimligi tárepinen inabatqa alınıp, shápik qollı aldınǵı terimshiler óz waqtında xoshametlenip barılmaqta.

Qaraózek rayonı Quralpa awıl puqaralar jıyınında jaylasqan «Baybura» fermer xojalıǵında jámlespegen jaslar arasında paxta teriw boyınsha jarıs shólkemlestirildi. Bir kún dawamında ótkerilgen jarıs juwmaǵında, birinshi orındı 238 kg paxta tergen Júzimgúl Erimbetova jeńip alıwǵa eristi.
Ekinshi orın 208 kg paxta tergen Gulaysha Musabekovaǵa, úshinshi orın 181 kg paxta tergen Ersultan Murtazaevqa nesip etti.
Jarıs sońında Qaraqalpaqstan Respublikası Joqarǵı Keńesiniń komitet baslıǵı Sh. Ótemisov, rayon hákimi A. Baymuratov hám rayon prokurorı B. Aberkulovlar jaslarǵa harmasın aytıp, olarǵa rayon hákimliginiń Húrmet jarlıqları hám estelik sawǵaların tapsırdı.
Ilaj dawamında paxta terimine járdemge kelgen terimshilerge Qaraózek rayonlıq Mádeniyat bóliminiń tayarlaǵan yoshlı koncert baǵdarlaması qoyıp berildi.
Bunday ilajlar respublikamız boylap dawam etpekte.

Adilbay Orazov,
Qaraqalpaqstan xabar agentligi sholıwshısı