Xalqımızdıń baylıǵı bolǵan aq altındı sepsitpey, jawın-shashınǵa qaldırmay terip jıynap alıw búgingi kúnniń áhmiyetli wazıypası esaplanadı. Erte báhárden baslap, jazdıń ıssısı demey miynetin shekken fermer xojalıǵı aǵzaları bul áhmiyetli wazıypanı jedellik penen alıp barıp, belgilengen jobanı orınlap, elimizdiń aq altın qırmanına úles qosıwdı ózleriniń ádiwli minneti dep biledi. Áyne payıtta elimizdiń barlıq orınlarında paxta jıyın terim isleri dawam etpekte.

Taqıyatas rayonı “Naymankól” awıl puqaralar jıyını aymaǵında jaylasqan fermer xojalıqlarında da 2025-jılǵı paxta terimi máwsimi joqarı dárejede shólkemleskenlik penen dawam etpekte. Bul mapazda úyinde bos otırǵan jumıssız puqaralar ushın jıyın- terim mapazı haqıyqıy miynet hám dáramat máwsimine aynalmaqta. Awıl belsendileri hám belsendi terimshiler tárepinen terim jumıslarına salmaqlı úles qosılmaqta.
-Úy biykesi bolıp úyde otırǵan edim. Paxta jıyım terimi baslanǵanlı berli mapazǵa qatnasıp atırman. Fermer tárepinen jaqsı sharayatlar jaratılǵan. Miynet haqımızǵa paxtanıń kilogrammına eki mıń sumnan tólep berip atır. Kúnine júz kilogrammnan aslam paxta terip atırman,-deydi naymankólli Bazargúl Shamuratova.
Rayondaǵı mákán hám awıl puqaralar jıyınları baslıqları paxta jıyın-terimine belsene qatnasıp atırǵan awıl miynetkeshlerine harmasın aytıp, paxta terimine óz úlesin qospaqta. Sonday-aq, jaqsı terimshiler xoshametlenip barılmaqta.

Qaraqalpaqstan xabar agentligi