Taxtakópir rayonındaǵı 10-sanlı ulıwma orta bilim beriw mektebi aymaqtaǵı eń úlgili oqıw dárgaylarınıń biri bolıp, mektepke tájiriybeli pedagog «Ózbekstan Respublikası xalıq bilimlendiriwiniń aǵlası» Qatshaxan Baymurzaeva basshılıq etip kelmekte.

Ózbekstan mákan puqaralar jıyını orayında jaylasqan mektepte búgingi kúni 450 oqıwshı oqıp bilim almaqta. Olarǵa óz kásibiniń mamanı bolǵan 51 muǵallim sabaq bermekte. Oqıw ornında oqıwshılardıń zaman talabına say tálim-tárbiya alıwı ushın barlıq qolaylı sharayatlar jaratıp berilgen.
-Sońǵı jılları húrmetli Prezidentimiz Sh. Mirziyoev tárepinen bilimlendiriw tarawına qaratılıp atırǵan itibar hám qollap-quwatlawdıń nátiyjesinde, awıllıq jerlerdegi mekteplerde de qaladaǵıday sharayatlar jaratılıp, bul oqıwshılar menen birge pedagog-xızmetkerlerge de keń imkaniyatlar jaratıp bermekte,-deydi Qatshaxan Baymurzaeva.-Ásirese, muǵallimlerimizdiń paxta jıyın-terimi hám basqa da jámiyetlik jumıslardan azat etiliwi, olardıń ózleriniń ústinde ele de kóbirek izleniwine múmkinshilik jarattı. Bunıń nátiyjesinde, mektebimiz muǵallimleriniń bilim hám is-tájiriybesi artıp, oqıwshıları pánler olimpiadası, hár qıylı tańlaw hám sport jarıslarında jeńimpazlıqtı qolǵa kirgizip kelmekte. Álbette, muǵallimlerdiń islegen bul miynetleri elimiz basshıları hám ministrlik tárepinen óz waqtında xoshametlenip, olardıń ayırımlarınıń aylıq miynet haqıları Prezidentimiz aytqanınday 1000 AQSh dollarına jetpekte.
-1999-jıldan berli usı mektepte qaraqalpaq tili hám ádebiyatı páninen oqıwshılarǵa sabaq berip kelmektemen,-deydi mekteptegi usınday úlgili muǵallimlerdiń biri Gúlshad Omarova.-2021-jılı Manzura Mambetnazarova atlı oqıwshım 11-klass oqıwshıları arasında ótkerilgen pánler olimpiadasınıń Ózbekstan Respublikası basqıshında 3-orındı iyelegen bolsa, 2022-jılı Dilfuza Erimbetova degen oqıwshım rayonda jeńimpazlıqtı qolǵa kirgizip, respublikalıq basqıshqa múnásip túrde qatnasıp qayttı. Meniń ózim de mektepti pitkeretuǵın jılı házir universitette oqıtıwshı bolıp isleytuǵın ádiwli ustazım Qonısbay Yusupovtıń maǵan bergen biliminiń arqasında, oqıwshılar arasında ótkerilgen pánler olimpiadasında Qaraqalpaqstanda 1-orındı iyelewge miyasar bolǵan edim. Búgingi kúni sol ustazımnan alǵan bilimlerimdi jas áwladqa jalıqpastan úyretip kiyatırman. Ózbekstan Respublikası Prezidentiniń 2019-jıl 3-maydaǵı «Intalı jaslardı anıqlaw hám joqarı mamanlıqtaǵı kadrlar tayarlawdıń úziliksiz sistemasın shólkemlestiriw ilajları haqqında»ǵı qararı tiykarında xoshametlenip, házirgi waqıtta mektepten 13-14 mln sum aylıq miynet haqı alıp júrmen. Bunıń ushın húrmetli Prezidentimiz Sh. Mirziyoevqa úlken raxmet aytaman.
Haqıyqatında da, islegen miynetińniń jemisin kórgenge ne jetsin. Kóksin «Ózbekstan Respublikası xalıq bilimlendiriwiniń aǵlası» hám «Ibratlı hayal» kókirek belgileri bezegen Gúlshad Omarovanı ózlerine úlgi tutıp, sonday úlgili ustaz bolıwdı niyet etken muǵallimler mektepte kópshilikti quraydı. Olardıń arasında inlis tili páni muǵallimleri Gúljáhán Turǵanbaeva, Gúlnaz Mırzaxanova, baslawısh klass muǵallimi Biybigúl Turdımuratova, tariyx páni muǵallimi Nargiza Jaqsılıqova, dene tárbiyası páni muǵallimi Bayram Embergenov, qaraqalpaq tili hám ádebiyatı páni muǵallimi Aynura Reyimbaevlardı aytıp ótsek boladı.
-2024-jıldıń birinshi máwsiminde «Ashıq byudjet» portalınan 1 mlrd 350 mln sum utıp alıp, oǵan mektebimiz qasınan jasıl qaplamalı, ústi bastırmalı futbol maydanshasın qurǵızdıq,-deydi Q.Baymurzaeva.-Al, ekinshi máwsimde bolsa, 1 mlrd 350 mln sum jeńip alıp, mektebimiz qasınan zamanagóy kásip-ónerge úyretiw orayınıń jańa imaratın qurıwǵa eristik. Sonday-aq, usı qarjı esabınan balalar ushın sport penen shuǵıllanıw maydanshası qurılıp, 16 videokamera satıp alındı.
Áne, ózlerine jaratılǵan qolaylıqlardan nátiyjeli paydalanıp kiyatırǵan mektep jámáátiniń alǵa qoyǵan maqsetleri oǵada kóp. Házirgi kúnleri olar bul iygilikli islerdi ámelge asırıw ushın pidayılıq penen jumıs alıp barmaqta.

Adilbay Orazov,
Qaraqalpaqstan xabar agentligi sholıwshısı