Jasırarlıǵı joq, sońǵı jılları respublikamızda Ózbekstan Respublikası Prezidenti Sh.Mirziyoevtiń basshılıǵında júrgizililgen keń kólemdegi reformalar nátiyjesinde, xalıq xojalıǵınıń barlıq tarawları sıyaqlı bilimlendiriw tarawında da úlken ózgeris hám jańalanıwlar júz bermekte. Respublikamızdıń qala hám awıllarında jańa bilimlendiriw shólkemleri boy tiklep, eskilerine kapital ońlaw jumısları júrgizildi hám olardıń materiallıq-texnikalıq bazası jańalandı.

Taxtakópir rayonındaǵı qánigelestirilgen mektep te usınday jańadan jumıs baslaǵan oqıw orınlarınıń biri bolıp, mektep Ózbekstan Respublikası Prezidentiniń 2022-jıl 14-apreldegi Pármanı tiykarında shólkemlestirilgen. Búgingi kúni bul oqıw dárgayında anıq hám tábiyǵıy pánler baǵdarı boyınsha 317 oqıwshı bilim almaqta.
-Mektebimizde oqıwshılardıń zaman talabına say oqıp bilim alıwı ushın, barlıq qolaylı sharayatlar jaratılǵan,-deydi Shiyrin Berdieva.-Olarǵa óz qánigelikleriniń mamanı bolǵan 38 muǵallim sabaq bermekte.
-2020-jılı Ájiniyaz atındaǵı Nókis mámleketlik pedagogikalıq institutın matematika qánigeligi boyınsha pitkerip, Taxtakópir rayonındaǵı 8-sanlı ulıwma orta bilim beriw mektebinde muǵallim bolıp isledim,-deydi Shaxnoza Tulibaeva.-Házirgi waqıtta Taxtakópir rayonındaǵı qánigelestirilgen mektepte oqıwshılarǵa matematika páni boyınsha sabaq berip kelmektemen. Húrmetli Prezidentimizdiń muǵallimlerge kórsetip atırǵan atalarsha ǵamqorlıǵı hám qollap-quwatlawı nátiyjesinde, pedagoglardıń nátiyjeli jumıs islewi ushın mektebimizde barlıq qolaylı sharayatlar jaratıp berilgen. Oqıw xanalarımız sabaq ótiwimiz ushın eń zamanagóy zárúrli qurallar menen támiyinlenip, oqıwshılarǵa sapalı bilim berip kelmektemiz. Házirgi waqıtta miynet haqılarımız da kóbeyip, ayına 10-11mln sumnan aylıq alıp atırmız. Bunıń ushın elimiz Prezidenti Sh.Mirziyoevqa úlken raxmet aytamız.
-Mektebimizde ózleriniń pánleri boyınsha milliy hám xalıqaralıq sertifikatlarǵa iye muǵallimler barshılıq,-deydi mektep direktorınıń oqıw isleri boyınsha orınbasarı Nurlepes Jubanıshov.-Atap aytqanda, biologiya páni muǵallimi Baxıtgúl Talxanbaeva, qaraqalpaq tili hám ádebiyatı páni muǵallimi Aysha Kemalova, fizika páni Abdisherip Bektemirov, matematika páni muǵallimi Ruslan Sayımbetovlar 12-13 mln sumnan aylıq almaqta. Bul muǵallimlerimizge ayrıqsha kúsh-jiger baǵıshlap, olardı iygilikli maqsetlerge qaray umtıldırmaqta.
Álbette, muǵallimlerge kórsetilip atırǵan bunday joqarı húrmet hám qollap-quwatlaw óziniń unamlı jemisin berip, mektep oqıwshıları rayon hám respublika kóleminde ótkeriletuǵın pánler olimpiadası hám tańlawlarda jeńimpazlıqtı qolǵa kirgizip kelmekte.

Adilbay Orazov,
Qaraqalpaqstan xabar agentligi sholıwshısı.