Ózbekstan Ekologiyalıq partiyası Qaraqalpaqstan Respublikası partiya shólkemi tárepinen sentyabr-oktyabr aylarında «Ekologiya hám jaslar» aylıǵı járiyalanıp, orınlarda usı aylıq sheńberinde ilajlar ótkerilmekte.

Ájiniyaz atındaǵı Nókis mámleketlik pedagogikalıq institutında «Ekologiyalıq ádetler turmıstı ózgertedi» atamasında ótkerilgen seminarda jaslardıń tábiyat penen qarım-qatnası, olardıń baslamaları hám belsendiligi haqqında keń túrde pikir alısıldı.
Seminar dawamında ekologiyalıq mashqalalardı sheshiwde jaslardıń belsendiligin arttırıw, ekologiyalıq baslamaların alǵa qoyıw hám olardı ámeliy joybarlar arqalı qollap-quwatlaw, ekologiyalıq ádetlerdiń kúndelikli turmıstaǵı ornı máseleleri talqılandı.
– Seminardıń maqseti jaslarımızdı tábiyatqa itibarsız bolmawǵa, onı jasıllandırıwǵa óziniń úlesin qosıwı múmkin ekenligin ańlawǵa shaqırıwdan ibarat, -deydi «Ekologiya hám salamatlıq» hayal-qızlar klubı keńesiniń baslıǵı Aydana Abdiraxmanova. – Eger jaslarımız qorshaǵan ortalıqtı qásterlep saqlawǵa bel baylasa, erteńgi kúnimiz jáne de salamat bolıp, elimiz gúllep-jasnaydı.
Sonday-aq, ilaj dawamında student-jaslarǵa ekologiyalıq nızamshılıqtaǵı sońǵı jańalıqlar, deputatlardıń minnetleri hám jergilikli dárejedegi baslamalardı qollap-quwatlawdaǵı roli haqqında keń túrde maǵlıwmat berildi.
Seminarda qatnasıwshılar ekologiyalıq juwapkershilikti tereń ańlaw, jasıl aymaqlardı keńeytiw, qorshaǵan ortalıqtı qorǵaw hám puqaralıq jámiyetinde belsene qatnasıw baǵdarında tereń túsinikke iye boldı.

Qaraqalpaqstan xabar agentligi