Sońǵı jılları Ózbekstan Respublikası Prezidenti Sh. Mirziyoevtiń bilimlendiriw tarawına bolǵan ayrıqsha itibarı nátiyjesinde tarawda kóplegen unamlı ózgerisler ámelge asırılmaqta. Elimizde Mektepke shekemgi bilimlendiriw tarawında alıp barılıp atırǵan reformalardıń ámelge asırılıwın támiyinlew, keleshegimiz bolǵan perzentlerimizge sapalı tálim-tárbiya beriw, ustaz hám muǵallimlerdi húrmet etiw máseleleri mámleketlik siyasattıń tiykarǵı baǵdarlarınan biri bolıp kelmekte.

Sonıń ishinde, búgingi kúni balalardı baqshalarǵa qamtıp alıw kórsetkishi 2017-jılǵa salıstırǵanda 27 procentten 84 procentke jetkerilgeni, bul tarawda basqıshpa-basqısh unamlı nátiyjelerge erisilip atırǵanınan dárek beredi. Respublikamız aymaqlarında jańa mámleketlik hám jeke menshik baqshalardıń shólkemlestiriliwi, balalar ushın qolaylı sharayatlardıń jaratılıwı bul baǵdarda úlken ózgerislerge sebep bolmaqta.
Nókis qalasında Qaraqalpaqstan Respublikası Ministrler Keńesiniń Baslıǵı F.Ermanov hám Qaraqalpaqstan Respublikası Joqarǵı Keńesiniń sociallıq-mádeniy rawajlanıw, jaslar siyasatı hám jámiyetlik birlespeler máseleleri komitetiniń baslıǵı M.Atamuratovtıń qatnasıwında respublikamızdaǵı Mektepke shekemgi bilimlendiriw shólkemleriniń basshıları menen ushırasıwı bolıp ótti.
Ushırasıwda tarawda ushırasıp atırǵan kemshilikler de hár tárepleme kórip shıǵıldı. Atap aytqanda, ózlerinde bar imkaniyatlardan nátiyjeli paydalanbay atırǵan, tálim-tárbiya procesine nemquraydılıq penen qatnas jasap atırǵan ayırım basshılardıń jumısı keskin sınǵa alınıp, keleshek áwladqa tálim-tárbiya beriwdey juwapkershilikli wazıypaǵa itibarsızlıq penen qaraw múmkin emes ekenligi ayrıqsha atap ótildi.
Ushırasıw juwmaǵında juwapkerlerge tarawǵa baylanıslı mámleketlik baǵdarlamalarda belgilengen wazıypalardıń orınlanıwın támiyinlew, basshılardıń juwapkershiligin kúsheytiw, bilimlendiriwdiń sapasın hám nátiyjeliligin bunnan bılay da arttırıw boyınsha tiyisli tapsırmalar berildi.

Qaraqalpaqstan xabar agentligi