Ózbekstan «Milliy tiklanish» demokratiyalıq partiyası Oraylıq Keńesi baslaması menen respublikamızda partiyanıń jumısın bunnan bılay da janlandırıw, deputatlardıń wákilliklerinen nátiyjeli paydalanıwın támiyinlew maqsetinde ushırasıw ótkerildi.

Oǵan Ózbekstan Respublikası Oliy Majlisi Nızamshılıq palatası hám Qaraqalpaqstan Respublikası Joqarǵı Keńesindegi partiyanıń frakciya aǵzaları, partiya Oraylıq Keńesiniń wákilleri, jergilikli Keńeslerge partiyadan saylanǵan deputatlar qatnastı.
Onda Ózbekstan «Milliy tiklanish» demokratiyalıq partiyası Oraylıq Keńesi baslıǵınıń orınbasarı Feruza Muhamedjanova, Oliy Majlis Nızamshılıq palatasınıń deputatı Ruslan Djumamuratov, Qaraqalpaqstan Respublikası Joqarǵı Keńesiniń deputatı Ulıqbek Jalmenovlar shıǵıp sóylep, deputatlar tárepinen 2025-jıldıń segiz ayı dawamında ámelge asırılǵan jumıslardı sın kózqarastan kórip shıqtı hám 2025-2029-jıllarǵa mólsherlengen partiyanıń Saylawaldı baǵdarlamasında belgilengen wazıypalardıń orınlanıwı boyınsha pikir alıstı.
Ushırasıwda shıǵıp sóylewshiler partiya shólkemleri tárepinen aymaqta ámelge asırılıp atırǵan jumıslarǵa, jetiskenlik hám kemshiliklerge itibar qaratıp, partiyanıń baǵdarlamadaǵı maqset hám wazıypaların júzege shıǵarıw, deputatlar tárepinen ele tolıq paydalanılmay atırǵan imkaniyatlardı anıqlaw, saylawshılar hám elektorat máplerin qorǵaw sıyaqlı máseleler boyınsha óz pikir-usınısların bildirdi.
Atap aytqanda, Feruza Muhamedjanova óziniń shıǵıp sóylegen sózinde «Búgingi kúni saylawshılardı ápiwayı esabat yamasa qurǵaq wádeler menen isendirip bolmaydı. Siyasiy sanası hám oy-pikiri barǵan sayın joqarılap baratırǵan xalıq deputatlardan ámeliy jumıslar hám anıq baslamalar kútedi. Sonıń ushın hár bir xalıq wákili óziniń deputatlıq statusına múnásip túrde, úlken juwapkershilik penen jumıs alıp barıwı zárúr,»- dep atap ótti. Sonday-aq, ol jergilikli wákillikli uyımlardaǵı partiya toparları hám deputatlardı óz wákilliklerinen nátiyjeli paydalanıwǵa, saylawshılar menen turaqlı qarım-qatnas ornatıw hám partiyanıń maqset hám wazıypalarınan kelip shıqqan halda intakerlikti bunnan bılay da arttırıwǵa shaqırdı.
Ushırasıwda deputatlar tárepinen partiyanıń baǵdarlamalıq wazıypaların jáne de nátiyjeli ámelge asırıw boyınsha usınıslar bildirildi. Atap aytqanda, jaslar menen islesiw, ónermentshilikti rawajlandırıw, milliy qádiriyatlar hám tariyxıy miyras obektlerin qásterlep saqlaw, bilimlendiriw hám ruwxıylıq tarawındaǵı bir qatar joybarlar dodalandı.
Ilaj juwmaǵında nátiyjeli jumıs alıp barǵan bir qatar deputatlar partiyanıń Oraylıq Keńesi tárepinen Húrmet jarlıǵı hám estelik sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı