Ellikqala rayonı Ámirabad awıl puqaralar jıyını aymaǵında jaylasqan “Ulli zamin mevalari” fermer xojalıǵı 10 gektar jer maydanında baǵshılıq penen shuǵıllanbaqta.

Atap aytqanda, xojalıqta 3 gektar alma, 4 gektar erik hám 3 gektar júzimniń taypı sortları egilgen bolıp, búgingi kúni júzimlerden gektarınan ortasha 30 tonnaǵa shekem ónim alınbaqta. Jetistirilgen ónimler Qazaqstan hám Rossiya mámleketlerine eksport etilip atırǵanı, bul tarawdıń eksport potencialı joqarı ekeninen dárek beredi.
Fermer xojalıǵınıń basshısı Lazizbek Hasanovtıń atap ótiwinshe, awıl xojalıǵın modernizaciyalaw, joqarı ónimdarlı sortlardı egiw hám nátiyjeli agrotexnologiyalardı engiziw nátiyjesinde xojalıq ekonomikalıq turaqlılıqqa erispekte.
Maǵlıwmat sıpatında sonı aytıp ótiwimiz kerek, Ellikqala rayonında Prezidentimizdiń 2023-jıl 3-avgust kúngi PQ-260-sanlı qararınıń 3-bántinde belgilengen wazıypalardıń orınlanıwı sheńberinde, júzimgershilikke qánigelestirilgen jámi 276 gektar maydan bar. Sonnan házirgi waqıtta 200 gektar júzimbaǵları tolıq ónim bermekte.
Bul bolsa aymaqta baǵshılıqtı rawajlandırıw hám xalıqtıń dáramat dáreklerin keńeytiwge xızmet etpekte.

Qaraqalpaqstan xabar agentligi