Ellikqala rayonı Aqshakól awıl puqaralar jıyını aymaǵında jaylasqan “Xudaybergen Ernazarov” fermer xojalıǵı mámleketke paxta tapsırıw boyınsha belgilengen rejeni tolıq orınladı.

Erte báhárde 30 gektar jerge shigit sepken xojalıq aǵzaları, jazı boyı islengen agrotexnikalıq qádelerge say júrgizilgen tárbiya jumıslarınıń nátiyjesinde, atızlarda mol zúráát jetistiriwge eristi.
-Ózbekstan Respublikası Prezidentiniń 2024-jıl 13-fevraldaǵı PQ-71-sanlı qararı talaplarınan kelip shıǵıp, hár bir gektar jerge 500 kilogramnan biogumus tógini berildi hám bul óziniń jaqsı nátiyjesin berdi,-deydi xojalıq baslıǵı Ilham Ernazarov.-Bul baslama sebepli, atızlarda tek ǵana ónimdarlıq artıp qoymastan, al mámleket tárepinen hár bir gektar ushın 1 million sumnan subsidiya ajıratılıp, bizler ushın úlken járdem boldı.
Búgingi kúnge shekem hár bir gektar jerden ortasha 40 centnerden ónim jetistirgen xojalıq aǵzaları aldaǵı waqıtları paxta jıyın-terimine jáne de pát endirip, mámleketke taǵı da 10 tonna ónim tapsırıwdı rejelestirmekte. Bunıń ushın olarda barlıq imkaniyat hám múmkinshilikler bar.

Adilbay Orazov,
Qaraqalpaqstan xabar agentligi sholıwshısı