Jańa Ózbekstanda dóretiwshi insanlarǵa ayrıqsha itibar qaratılıp, xalqımızdıń ruwxıy dúnyası, mádeniyatı menen mánawiyatın bayıtıw jolındaǵı iygilikli isler hár tárepleme qollap-quwatlanıp barılmaqta. Bul ázelden xalqımızǵa tán ádebiyatqa, mádeniyatqa, kórkem ónerge, dóretiwshilikke bolǵan ayrıqsha mehir hám itibardıń kórinisi bolıp esaplanadı.

Ózbekstan Respublikası Prezidenti Sh. Mirziyoev elimizdiń dóretiwshi zıyalıları wákilleri menen ushırasıwında – «Ádebiyat penen kórkem ónerge, mádeniyatqa itibar – bul bárinen burın, xalqımızǵa itibar, keleshegimizge itibar, ullı shayırımız Sholpannıń aytqanınday, ádebiyat, mádeniyat jasasa, millettiń jasaw múmkinshiligin umıtıwǵa biziń hasla haqımız joq,» – degen edi.
Xalqımızdıń ruwxıy dúnyasın bayıtıwda ádebiyattıń, mádeniyattıń ornı girewli eken, demek biz ózleriniń ólmes ájayıp dóretpeleri menen xalqımızǵa tanılǵan jazıwshı-shayırlar menen dóretiwshi insanlardıń ómirin, úlgili miynet jolın ósip kiyatırǵan jas áwladlarǵa tereńirek tanıstırıp barıwımız dárkar. Mine, usınday ózine tán dóretiwshilik jolı menen xalqımız júreginen jıllı orın iyelegen qıssaxan shayır, Qaraqalpaqstan xalıq shayırı, Ózbekstan xalıq jırshısı Abbaz Dabılov boldı.
Bıyıl ullı sóz zergeriniń tuwılǵanına 127 jıl tolmaqta.
Usı múnásibet penen Qaraqalpaqstan Jazıwshılar awqamı, Qaraqalpaqstan Respublikası Mádeniyat ministrligi hám Taxtakópir rayonı hákimliginiń shólkemlestiriwi menen 18-sentyabr kúni Taxtakópir rayonında belgili shayır hám qıssaxan Abbaz Dabılovtıń esteligine baǵıshlanǵan «Abbaz hawazı- Qaratereń ırǵaqları» folklor festivalı bolıp ótti.
Festival sheńberinde qıssaxanlıq hám aytıs janrı boyınsha jarıs, sonday-aq, folklor- etnografiyalıq jámáátleri arasında «Milliy qádiriyatlar sazaları» atamasındaǵı respublikalıq tańlaw ótkerildi.
Ótkerilgen festivalǵa respublikamızdıń kóplegen aymaqlarınan háwesker shayır, qıssaxan, baqsı, aqın hám folklor ansamblleri qatnasıp, olardıń saxnaǵa shıǵıwları tájiriybeli tóreshiler quramı tárepinen múnásip túrde bahalanıp barıldı.
Oǵada qızıqlı ótken tańlaw juwmaǵında, aytıs janrı boyınsha birinshi orındı taxtakópirli aqın Erkebulan Qolqanatov jeńip alǵan bolsa, sıylı ekinshi hám úshinshi orınlar kegeylishi Dilnaz Ótemuratova hám nókisli jas shayır Muhammetdin Aytjanovqa nesip etti.
Al, qıssaxanlıq boyınsha ótkerilgen jarısta bolsa, Tórtkúl rayonınan kelgen jas qıssaxan Islambek Ziynatdinov bas sıylıq iyesine aylandı.
Tańlawdıń sıylı ekinshi ornın nókisli shayır Rawaj Otarbaev hám shımbaylı jas talant iyesi Marqabay Álimbetov, sıylı úshinshi orındı taqıyataslı Gúmisay Mustafaeva, qanlıkólli Dámetken Turekeeva hám taxtakópirli Nursulıw Qállibekovalar jeńip aldı.
Al, folklor-etnografiyalıq jámáátleriniń «Milliy qádiriyatlar sazaları» atamasındaǵı tańlawda bolsa, 3-orındı Tórtkúl rayonınıń «Aynalayın» qazaq folklor-etnografiyalıq ansambli hám Kegeyli rayonınıń «Aqtuba» folklor-etnografiyalıq ansambli jeńip alıwǵa miyasar boldı.
Sıylı ekinshi orın Qaraózek rayonınıń «Mıń túmen» hám Ellikqala rayonınıń «Bostan gúlleri» folklor-etnografiyalıq ansambli, birinshi orın Nókis qalasınıń «Suw serper» folklor-etnografiyalıq ansambline nesip etti.
Festivaldıń bas sıylıǵı bolǵan «Gran-Pri»di bolsa, saxna iyeleri esaplanǵan Taxtakópir rayonınıń «Miyras» folklor-etnografiyalıq ansambli jeńip aldı.
Tańlaw sońında Qaraqalpaqstan Respublikası mádeniyat ministriniń birinshi orınbasarı B.Allakov hám Taxtakópir rayonı hákiminiń orınbasarı Sh.Bekturǵanov shıǵıp sóylep, jeńimpazlardı erisken tabısları menen qutlıqladı hám olarǵa shólkemlestiriwshiler tárepinen tayarlanǵan arnawlı diplom hám estelik sawǵalardı tapsırdı.

Adilbay Orazov,
Qaraqalpaqstan xabar agentligi sholıwshısı.