Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikası Mádeniyat ministrligi tárepinen tarawda ámelge asırılıp atırǵan jumıslarǵa baǵıshlanǵan baspasóz konferenciyası bolıp ótti.

Baspasóz konferenciyasında mádeniyat ministri Begis Temirbaev 2025-jıldıń usı kúnine shekem ámelge asırılǵan jumıslar haqqında ǵalaba xabar quralları wákillerine esap berdi.
Atap aytqanda, jıl basında mádeniy-aǵartıwshılıq hám kewilashar ilajlar rejesi belgilep alınıp, 2 mıń 977 hár qıylı ilajlar shólkemlestirilgeni málim etildi.
3 mámleketlik teatrda 915 ten aslam spektakl qoyılıp, olarǵa 186 mıńnan zıyat tamashagóy kirgen. Jámáátler 7 xalıqaralıq mádeniy ilajda múnásip qatnastı.
Qala hám rayonlardaǵı mádeniyat orayları tárepinen 3 mıń 650 mádeniy-kewil ashar ilaj ótkerilip, xalıqqa mádeniy xızmet kórsetildi. Búgingi kúnde jumıs alıp barıp atırǵan 60 mádeniyat orayında respublika boyınsha jámi 210 dógerek jumıs alıp barıp atırǵan bolsa, olarǵa 2287 qatnasıwshı turaqlı túrde qatnaydı.
Búgingi kúnde ministrlikke qaraslı 2 joqarı oqıw ornınıń filialı, 3 qánigelestirilgen kórkem óner hám mádeniyat mektebi, mektep-internatlar, sonday-aq, 24 balalar muzıka hám kórkem óner mekteplerinde jámi 9 mıń 677 oqıwshı hám studentler bilim alıp kelmekte. Olarǵa 1 mıń 722 oqıtıwshı hám professorlar óner sırların úyretip kelmekte.
Jıl basınan búgingi kúnge shekem ministrlikke qaraslı mákemeler hám dóretiwshi jámáátler Malayziya, Yaponiya, Italiya, Túrkiya, Gruziya, Ázerbayjan, Qırǵızstan, Qazaqstan mámleketlerinde ótkerilgen xalıqaralıq festival hám mádeniy ilajlarǵa belsene qatnastı.
Xalıqaralıq baylanıslar baǵdarında búgingi kúnde TÚRKSOY- Túrkiy xalıqlardıń mádeniyat shólkemi, YuNESKO, Tatarstan hám Bashqurtstan Respublikası Mádeniyat ministrlikleri, sonday-aq, Rashid Vagapov atındaǵı tatar mádeniyatı fondı, Italiyanıń “Samarkanda” shólkemi, Qubla Koreyanıń «NY Education» kompaniyaları menen turaqlı túrde birge islesiw jolǵa qoyılǵan.
Bıyılǵı jılı balalar muzıka mekteplerindegi hám mádeniyat oraylarındaǵı dógereklerge qatnasıwshı oqıwshılardıń ata-analar tólemin onlayn “QR code” arqalı ámelge asırıwda Click firması menen shártnama dúzildi hám jańa oqıw jılınan tolıq iske túsirildi.
Búgingi kúnde tarawǵa jámi 609,5 mıń AQSh dolları muǵdarında grant hám 2 mlrd 50,7 mln sum muǵdarında investiciya qarjıları kirgizildi.
Ótken jılı ministrlik janınan shólkemlestirilgen «ART KARAKALPAKSTAN» mámleketlik emes kommerciyalıq emes mádeniyat hám kórkem ónerdi rawajlandırıw shólkemi jaqında Oliy Majlis janındaǵı Puqaralıq jámiyetlerin qollap-quwatlaw institutların qollap-quwatlaw Jámiyetlik fondı tárepinen járiyalanǵan mámleketlik sociallıq buyırtpalar tańlawında qatnasıp, “Ustaxana-milliy miyras” joybarı menen jeńimpaz boldı hám joybar 1 milliard sum muǵdarında qarjılandırıldı. Bul joybar sheńberinde Nókis rayonında Oraylıq Aziya xalıqlarınıń milliy muzıka saz ásbaplarınan – qobız, duwtar, shıńqobız, girjek hám basqa da muzıka ásbapların islep shıǵarıwshı ustaxana qurıladı.
Sonday-aq, xabarıńız bar, respublikamızda bir neshe jıllardan berli Tólepbergen Qayıpbergenov atındaǵı mádeniyat hám ádebiyattı rawajlandırıw fondı jumıs alıp barmaqta. Jaqında ministrlik tárepinen usı fond penen birgelikte Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń muzeyin shólkemlestiriw boyınsha arnawlı joybar tayarlanıp, joybarǵa Ózbekstan Respublikası Mádeniyat ministrligi janındaǵı fond tárepinen 251 million 250 mıń sum ajıratıldı hám házirde usı muzeydi shólkemlestiriw jumısları baslap jiberildi.
Elimizde talantlı jaslardı qollap-quwatlaw maqsetinde ótkerilip atırǵan “Yosh” estradalıq joybarına búgingi kúnge shekem 400 den aslap jaslarımız qatnasqan bolsa, solardan qırqı eki máwsimde qatnastı. Bul joybar kelesi jıldan baslap Ózbekstan kóleminde ótkeriliwi rejelestirilip atırǵanın ayrıqsha atap óttiwimiz tiyis.
Koreya Respublikasınıń “HY Education” kompaniyası menen birgelikte Mega Foundation Course (MFC) baǵdarlaması arqalı Qubla Koreyanıń joqarǵı oqıw orınlarında bilim alıwdı qálewshi studentlerdi qollap-quwatlaw boyınsha shártnamaǵa qol qoyıldı. Bunnan gózlengen tiykarǵı maqset – qaraqalpaqstanlı jaslardıń xalıqaralıq dárejede bilim alıwına járdemlesiw bolıp tabıladı.
Sonday-aq, ilaj dawamında Mádeniyat ministri B.Temirbaev ǴXQ wákillikleriniń sorawlarına juwap berip, pikir-usınısların tıńladı.
Ilajdan soń qatnasıwshılar rejissyor Muxtar Reymov saxnalastırıwındaǵı Ózbekstan Qaharmanı, Ózbekstan hám Qaraqalpaqstan xalıq jazıwshısı T.Qayıpbergenovtıń “Qaraqalpaq qızı” spektaklin tamashaladı.

Qaraqalpaqstan xabar agentligi