Nókis qalasındaǵı 8-sanlı ulıwma orta bilim beriw mektebinde Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen Ózbekstan Respublikası Málimleme texnologiyaları hám sanlastırıw ministrliginiń Qaraqalpaqstan Respublikası bólimi menen birgelikte respublikalıq ámeliy seminar shólkemlestirildi.

Ilajdıń ashılıwında bilimlendiriw ministrliginiń, Málimleme texnologiyaları hám sanlastırıw sistemasınıń juwapkerleri, respublikamızdıń informatika páni oqıtıwshıları qatnastı.
Búgingi kúnde málimleme texnologiyaları jedel pátler menen rawajlanıp barmaqta. Bul bolsa muǵallimlerden óz bilim hám tájiriybelerin úzliksiz túrde arttırıp barıwdı talap etpekte.
– Qaraqalpaqstan Respublikası Joqarǵı Keńesiniń sanlastırıw tarawın rawajlandırıw boyınsha tapsırmalarına bola, ulıwma orta bilim beriw mektepleriniń 5-6-7-klass oqıwshılarınıń informaciyalıq texnologiyalarǵa bolǵan qızıǵıwshılıǵın jáne de arttırıw, olardıń informaciyalıq kompetenciyaların qáliplestiriw, programmalastırıw tiykarların úyretiw, jaslardı zamanagóy IT baǵdarlarına keńnen tartıw maqsetinde «Informatika hám informaciyalıq texnologiyalar» páninen qosımsha dógerek sabaqların shólkemlestiriw názerde tutılǵan,-deydi Qaraqalpaqstan Respublikası Mektepke shekemgi hám mektep bilimlendiriwi ministriniń birinshi orınbasarı A.Dáwletbaev.
– Oqıwshılardıń telefon menen islesiwinde birinshi gezekte olardıń tárbiyasın durıs jolǵa qıp, keyin smartfonlardan paydalanıwǵa ruqsat beriw kerek. Bul arqalı oqıwshılardıń telefon imkaniyatlarınan kóbirek paydalanıwı ushın sharayat jaratıladı. Álbette, onda balanıń ideologiyalıq immunitetin bekkemlewge úlken itibar qaratıw lazım, -deydi informatika páni oqıtıwshısı G.Amaniyazova. -Búgingi seminarda názerde tutılǵan qosımsha dógereklerdiń shólkemlestiriliwi nátiyjesinde oqıwshılardıń aldıńǵı texnologiyalar menen baylanıslı bilimleri turaqlı arttırıp barıladı.
Seminar dawamında IT baǵdarındaǵı dógereklerdiń jumısın sistemalı jolǵa qoyıw, dógerek jurnalın elektron túrde júrgiziw hám oqıwshılar haqqındaǵı maǵlıwmatlardı «kkbilimlendiriw.uz» platformasına kirgizip barıw máseleleri, muǵallimlerdiń aldıńǵı tájiriybeleri, metodikalıq kózqarasları hám innovaciyalıq sheshimleri dodalandı.

Qaraqalpaqstan xabar agentligi