Jaqında Qatar Mámleketi milliy kitapxanasınıń biybaha fondı “Ózbekstan qızlarınıń hawazı: mádeniyatlar arasında kópir hám dúnya ushın ilham” atamasındaǵı xalıqaralıq antologiyası menen bayıdı.

Elimizdegi qábiletli jas qızlardıń qosıq, gúrriń, maqala hám esselerinen ibarat bul toplam jaslarımızdıń arzıw-niyetin, ilimge umtılısın hám jámiyettiń rawajlanıwına qosıp atırǵan úlesin sáwlelendiredi.
Antologiyanı Qatar milliy kitapxanasına Zulfiya atındaǵı mámleketlik sıylıqtıń iyesi, “Shine” qızlar akademiyasınıń basshısı Shohida Yusupova basshılıǵındaǵı ózbekstanlı studentler delegaciyası saltanatlı túrde tapsırdı.
Doslıq, birge islesiw ruwxında ótken ilajda mámleketimizdiń Doxadaǵı elshixanasınıń wákilleri, kitapxana basshılıǵı hám delegaciyamız aǵzaları qatnastı.
Ushırasıw dawamında eki mámleket arasındaǵı ádebiy birge islesiwdi bunnan bılay da rawajlandırıw, jaslardıń dóretiwshilik potencialın qollap-quwatlaw hám ul-qızlarımızdıń talantın xalıqaralıq kólemde úgit-násiyatlaw máseleleri kóterildi.
– Bul toplam arqalı tek ǵana ózbek qızlarınıń hawazı emes, al Watanımızdıń bay mádeniyatı hám tariyxın da dúnya saxnasına alıp shıǵıwdı maqset etkenbiz,-dedi Sh.Yusupova ÓzAnıń xabarshısına.
Bul baslama jaslarımız dóretiwshiligin xalıqaralıq kólemde keńnen úgit-násiyatlaw, Ózbekstan hám Qatar arasındaǵı mádeniy birge islesiw hám diplomatiyalıq baylanıslardı bekkemlewge xızmet etedi.

W.Alimov, ÓzA