Múnásibet

Xalqımızdıń keleshegi mektepten baslanadı. Sebebi, perzentlerimizge tálim hám tárbiya beriwdiń eń uzaq dawam etetuǵın, kerek bolsa, sheshiwshi basqıshı bul – mektep bilimlendiriwi,-degen edi húrmetli Prezidentimiz Sh.Mirziyoev. Jurtbasshımız atap ótkenindey, bilimlendiriw tarawın túp-tiykarınan reformalaw búgin dáwir talabına aylanǵan.
Usı jerde Prezident Shavkat Mirziyoevtiń kúni keshe “Muǵallimler hám ustazlar kúni” múnásibeti menen sóylesiwi waqtında pedagoglar ushın jańa jeńilliklerdi engizgeni muǵallim pedagoglarǵa kúsh baǵıshladı. Sonıń ishinde, kelesi oqıw jılınan mámleketlik joqarı oqıw orınlarına oqıwǵa kirgen pedagoglar perzentleriniń kontrakt pulına 30 procent shegirme beriliwi, jańa jıldan baslap keminde 15 jıl stajǵa iye bolǵan joqarı kategoriyalı pedagoglarǵa ipoteka krediti baslanǵısh tóleminiń 25 procenti qaplap beriliwi, oqıtıwshılar jańa bilimlendiriw texnologiyaların keńnen qollanıwı ushın kompyuter satıp alıwǵa 10 million sumǵa shekem jeńilletilgen kredit ajıratılıwı sıyaqlı jáne bir qatar jeńillikler qálb arxitektorları bolǵan muǵallimler ushın úlken imkaniyat bolıp esaplanadı. Mámleketimiz basshısı usı ushırasıwda “Eki Renessans dawamında insaniyatqa ustazlıq etken xalqımız arasında ustazlardı qádirlew hám olarǵa húrmet kórsetiw eń gózzal hám áyyemgi dástúrlerimizden birine aylanǵan. Búgin Jańa Ózbekstanda Úshinshi Renessans tiykarın qurıw degen oǵada ullı hám maqtanıshlı isti baslaǵan ekenbiz, bárinen burın, siz – áziz ustazlar hám talantlı shákirtlerińizge súyenemiz,” – degen edi.
Qalaberdi, tek ǵana muǵallimler emes, al baqsha tárbiyashıları ushın da áhmiyetli jańalıqlar baqlanıp atırǵanı haqıyqat.
Házirgi waqıtta 7 mıńnan aslam mámleketlik baqshalarda 120 mıńǵa shamalas pedagoglar bolǵanı menen olardıń tek ǵana 34 procenti joqarı maǵlıwmatqa iye. Biraq, házirgi waqıtta tárbiyashılardıń mektep muǵallimleri sıyaqlı kategoriyanı alıwı ushın joqarı oqıw ornı diplomı talap etiledi. Sonlıqtan, joqarı maǵlıwmatlı menen orta maǵlıwmatlı tárbiyashınıń aylıǵında ayırmashılıq bar.
Sonıń ushın, mámleketlik hám jeke menshik baqsha tárbiyashıların jumıstan ajıralmaǵan halda joqarı oqıw orınlarında oqıtıw jolǵa qoyılıp, jılına 10 mıń tárbiyashı joqarı maǵlıwmatlı etiliwi kadrlar máselesine sheshim bola aladı.
Jáne bir jańalıq. Prezident mektepleri sıyaqlı hár bir wálayatta “Jańa áwlad” baqshaları shólkemlestirilip, olarda tárbiyashılar aldınǵı pedagogikalıq texnologiyalardı úyrenedi. Eń áhmiyetlisi, jańa metodikalardı úyreniw ushın bul orınlardıń esigi jeke menshik baqsha tárbiyashılarına da bárqulla ashıq boladı. Demek, orınlarda “Jańa áwlad” baqshalarınıń jumıs alıp barıwına tiykar jaratılıp, sapa artadı. Eńgizilip atırǵan jeńillik hám jańalıqlardıń barlıǵı kadrlar potencialın arttırıw hám keleshegimiz iyeleri bolǵan perzentlerimizdiń múnásip tálim-tárbiya alıp, bilim alıwına xızmet etetuǵınına gúman joq.

Zavra Abdullaeva,
Qaraqalpaqstan Respublikası Joqarǵı Keńesiniń deputatı,
ÓzXDP frakciyası aǵzası.
Qaraqalpaqstan xabar agentligi