Búgingi kúnde finans bazarında jańa finanslıq ónim hám xızmetlerdi engiziw arqalı xalıq hám isbilermenlik subektlerin finanslıq qollap-quwatlaw kólemin keńeytiw hám sırt el investiciyaların tartıw ushın qolaylı sharayat jaratıw áhmiyetli wazıypa bolıp esaplanadı. Usı maqsette Ózbekstanda islam bankiniń jumısın jolǵa qoyıwǵa qaratılǵan nızam joybarı islep shıǵıldı hám Oliy Majlis Nızamshılıq palatasınıń gezektegi májilisinde birinshi oqıwda konceptuallıq jaqtan kórip shıǵıldı.

Bizge belgili, islam finansında puldı belgili bir múddetke qosımsha haqı tólew esabınan qarızǵa beriw, islam dininde ruqsat etilmegen jumıslardı qarjılandırıw, shártnamalarda hádden tıs belgisizliklerge jol qoyıw sıyaqlılar qadaǵan etilgen.
Sonıń ushın óz jumısında islam finansı standartlarına muwapıqlıqtı támiyinlew maqsetinde islam banklerinde zárúr bilim hám qánigeliklerden quralǵan Islam finansı keńesi, islam finansı bólimi hám islam finansı auditi jumısın jolǵa qoyıw zárúr. Sonday-aq, islam finansında sawda hám sheriklik qarjılandırıwdıń tiykarǵı baǵdarı bolıp esaplanadı. Atap ótilgenindey, bul joybar menen Salıq hám Puqaralıq kodeksleri jáne 8 nızamǵa ózgerisler hám qosımshalar kirgizilmekte. Atap aytqanda, nızamshılıqqa islam bank jumısı, islam finans operaciyaları hám standartları jáne investiciyalıq depozit túsinikleri kirgizilmekte. Islam bank jumısın ámelge asırıw huqıqın beretuǵın licenziya engizilip, onı alıw boyınsha talaplar belgilenbekte.
Bankler tárepinen ámelge asırılatuǵın islam finans operaciyalarınıń tiykarǵı tárepleri belgilenbekte. Islam bank jumısın ámelge asırıwshı banklerge tikkeley sawda jumısın ámelge asırıw hám yuridikalıq táreplerdi shólkemlestiriw, olardıń ustav fondlarındaǵı úleslerin, akciyaların sheklewsiz alıwǵa ruqsat berilmekte. Oraylıq bank hám banklerde Islam finansı keńesi shólkemlestiriletuǵını jáne olardıń wazıypaları belgilenbekte.
Sonday-aq, nızam joybarında islam bank jumısın ámelge asırıw huqıqın beretuǵın licenziyanı engiziw názerde tutılıp, bul licenziyanı alıw boyınsha anıq talaplar da belgilenbekte. Sonıń menen birge, islam bank jumısın ámelge asırıw huqıqın beriwshi licenziyaǵa iye bankler tárepinen ámelge asırılatuǵın finanslıq operaciyalar belgilep berilmekte.
Atap ótilgenindey, bul nızam joybarı dástúriy finanslıq xızmetlerge alternativ finanslıq xızmetlerdi engiziw, islam finansın jolǵa qoyıwdıń huqıqıy tiykarın bekkemlewge xızmet etedi.
Dodalawlarda deputatlar tárepinen bir qatar sorawlar ortaǵa taslandı. Pikir-usınıslardan soń nızam joybarı birinshi oqıwda qabıl etildi.

Muhtarama Komilova,
Asliddin Alijonov (súwret),
ÓzA