Shımbay rayonı Qamısarıq awıl puqaralar jıyınınıń «Tońmoyın» awılında tuwılıp, kamalǵa kelgen Saylawbay Saparniyazov kishkeneliginen diyqanshılıqqa aralasıp ósti. Balalıǵınan til alǵısh, kishipeyil bolıp ósken ol mektepti pitkergennen soń, «Qaraqalpaqstan Respublikasına miyneti sińgen salıkesh» Jiyenbay Payzullaevtıń brigadasında úsh jıl suwshı, sońınan respublikamızǵa belgili ulama hám awıl xojalıǵı xızmetkeri Abubakir Abdirazaqovtıń «Báhár» fermer xojalıǵında 15 jıl is basqarıwshı bolıp mol tájiriybe toplaǵan ol 2016-jılı óziniń atına fermer xojalıǵın ashıwǵa eristi.

«Eńbek etseń emerseń» degenindey mine usı ótken jıllar ishinde Saylawbay basqarǵan «Saylawbay Tóreniyazovich» fermer xojalıǵı ózleriniń hadal mańlay teriniń arqasında, hár jıl sayın mámleketke paxta hám biyday tapsırıw shártnamaların artıǵı menen orınlap kelmekte.
-Bıyıl báhárde 16 gektar jerge «S-4727» sortlı paxta shigitin egip, oǵan belgilengen talaplarǵa say tárbiya jumısların júrgizdik,-deydi Saylawbay oǵan harmasınǵa barǵanımızda.- Usı islegen miynetlerimizdiń nátiyjesinde, atızlarımızda diydilengendey mol zúráát toplandı. Házirgi kúnleri paxta jıyın-terimi jumısların baslap jiberdik hám el qırmanına 23 tonnadan aslam ónim tapsırıwǵa miyasar boldıq. Nesip etse, terimshilerimiz usı pátti jazdırmasa eki-úsh kúnniń ishinde belgilengen rejeni artıǵı menen orınlaymız.
Haqıyqatında da, istiń kózin bilip jumıs islegenge ne jetsin. Ayırım fermerler menen sóylesseń, may hám tógin qımbat, waqtında suw jetispeydi dep nalıydı. Al, Saylawbayǵa uqsaǵan fermerler bolsa, barlıǵınıń esabın tawıp, hesh qanday mákemege qarızsız nátiyjeli jumıs júrgizip kelmekte.
-Ózbekstan Respublikası Prezidenti basshılıǵında elimizde awıl xojalıǵın bunnan bılay da rawajlandırıw, klaster hám fermer xojalıqların qollap-quwatlaw boyınsha kóplegen unamlı isler ámelge asırılmaqta,-deydi Saylawbay óz sózin dawam etip.-Ásirese, kelesi jıldan baslap fermerlerimizdiń qosımsha qun salıǵınan azat etiliwi, usınday iygilikli islerdiń dawamı desek boladı. Bunıń ushın húrmetli Prezidentimiz Sh.Mirziyoevqa úlken raxmet aytamız.
Shınında da házirgi kúnleri elimizdiń barlıq aymaqlarında sıyaqlı, Shımbay rayonında da paxta jıyın-terim jumısları qızǵın baslanıp ketti. Fermer xojalıqları tárepinen bir kilogramm paxta ushın 2000 sumnan aqsha tóleniwi awıl adamlarınıń miynet islewge degen qızıǵıwshılıǵın arttırıp, orınlarda is ónimdarlıǵınıń artıwına tiykar bolmaqta.

Adilbay Orazov,
Qaraqalpaqstan xabar agentligi sholıwshısı.