Ózbekstan yadro energetikası hám qáwipsizligin rawajlandırıw, aldınǵı xalıqaralıq tájiriybeni úyreniw hám strategiyalıq birge islesiwdi keńeytiw máselelerine úlken áhmiyet qaratıp kelmekte. Bul baǵdarda mámleketimiz Xalıqaralıq atom energiyası agentligi (XAEA) menen tıǵız birge islesip, milliy mápler hám global turaqlılıq ushın áhmiyetli qádemler taslamaqta.

Usı kúnlerde Vena qalasında ótkerilip atırǵan XAEAnıń 69-bas konferenciyasında Ózbekstan delegaciyasınıń qatnasıwı da áne, usı maqsetlerge qaratılǵan.
Bul konferenciya aǵza mámleketlerdiń birge islesiwiniń tiykarǵı baǵdarların belgileytuǵın, yadro energetikası, ilim, texnologiya hám qáwipsizlik tarawında áhmiyetli qararlar qabıl etiletuǵın tiykarǵı xalıqaralıq maydan bolıp esaplanadı.
Ánjumanda 170 ten aslam aǵza mámleket wákilleri qatnaspaqta. Olar agentlik jumısınıń tiykarǵı máselelerin dodalamaqta. Sonıń ishinde, 2024-jıldıń juwmaqları boyınsha esabat, 2026-jılǵa mólsherlengen byudjet, yadro ilimi hám texnologiyasın rawajlandırıw perspektivaları jáne global yadro qáwipsizligi máseleleri kún tártibine kirgizilgen.
Sonday-aq, konferenciya sheńberinde Ózbekstan delegaciyasınıń XAEA basshıları menen bir qatar ushırasıwları rejelestirilgen. Atap aytqanda, XAEA bas direktorınıń orınbasarı Lyu Xua menen mámleketimizde ámelge asırılıp atırǵan milliy joybarlardıń jaǵdayı, bar mashqalalı máseleler hám olardı sheshiw jolları boyınsha sóylesiwler ótkeriliwi názerde tutılǵan.
Bunnan tısqarı, eki tárepleme birge islesiw perspektivaları boyınsha da bir qatar ushırasıwlar belgilengen.
Sanaat, radiaciya hám yadro qáwipsizligi málimleme xızmetiniń atap ótiwinshe, Ózbekstannıń bul abıraylı xalıqaralıq ánjumanda qatnasıwı mámleketimizdiń yadro tarawındaǵı strategiyası, ilimiy-texnikalıq potencialı hám qáwipsizlikke qaratılǵan isenimli poziciyasın kórsetedi. Bul bolsa keleshekte hám milliy mápler, hám dúnya kóleminde turaqlı hám qáwipsiz rawajlanıwǵa xızmet etedi.

N.Ziyodullaeva tayyorladi, ÓzA