Ózbekstan densawlıqtı saqlaw sistemasında jeke menshik sektordıń roli keyingi jıllarda ayrıqsha kúsheymekte. Ásirese, jeke menshik emlewxanalar sanınıń artıwı mámlekettiń densawlıqtı saqlaw tarawındaǵı reformalar hám puqaralardıń medicinalıq xızmetlerge bolǵan talabınıń ósip atırǵanın kórsetpekte.

Milliy statistika komitetiniń maǵlıwmatına bola, 2025-jıl 1-yanvar jaǵdayına Ózbekstanda jeke menshik emlewxanalardıń sanı 1 mıń 301 ge jetti, bul 2019-jıldaǵı 575 ge salıstırǵanda eki esege kóp. Jıllar kesiminde jeke menshik emlewxanalardıń sanı: 2019-jılı – 575, 2020-jılı – 593, 2021-jılı – 637, 2022-jılı – 675, 2023-jılı – 724, 2024-jılı – 1 mıń 301 dizimge alınǵan.
Sońǵı jılları Húkimet densawlıqtı saqlaw tarawında jeke menshik sektordı rawajlandırıwǵa úlken itibar qaratpaqta. Jeke menshik emlewxanalar ashıw boyınsha tártipler ápiwayılastırıldı, licenziyalaw processleri jeńillestirildi. Xalıqtıń sanı hám dáramat dárejesiniń ósiwi menen birge, sapalı medicinalıq xızmetlerge bolǵan talap ta artıp barmaqta. Mámleketlik emlewxanalar bul talaptı tolıq qaplay almaǵan jaǵdaylarda, jeke menshik klinikalar áhmiyetli rol atqara basladı. Qalaberdi, jeke menshik medicina házirgi waqıtta biznes ushın da paydalı tarawlardan birine aylanǵan. Sapalı xızmet, zamanagóy úskeneler hám maman qánigeler járdeminde jeke menshik emlewxanalar qarıydarlardı tez tartıwǵa erispekte.
2019-2025-jıllar dawamında Ózbekstanda jeke menshik emlewxanalardıń sanı sezilerli dárejede ósiwi baqlanbaqta. Ásirese, 2024-jılı júz bergen derlik eki esege ósiw bul tarawda jańa basqısh baslanǵanın kórsetedi. Bul baǵdar mámleketlik siyasat, xalıqtıń talapları hám pandemiya tásiri nátiyjesinde júzege keldi.
Keleshekte jeke menshik sektor hám mámleketlik medicina mákemeleri arasında nátiyjeli birge islesiwdi jolǵa qoyıw, sapa qadaǵalawın kúsheytiw hám innovaciyalardı engiziw arqalı densawlıqtı saqlaw sistemasınıń ulıwma potencialın jáne de arttırıw múmkin.

Dildora DWSMATOVA.
ÓzA