Ózbekstan Milliy málimleme agentligi (ÓzA) hám Qubla Koreyanıń jetekshi málimleme agentligi – “Yonhap” material almasıw, kásiplik qatnasıqtı rawajlandırıw hám birgeliktegi media joybarlardı ámelge asırıwdı názerde tutatuǵın Birge islesiw memorandumına qol qoydı.

Hújjet Ózbekstannıń Shıǵıs Aziyadaǵı abırayın keńeytiw, sonıń ishinde, Koreya Respublikası jámiyetshiligin mámleketimizdiń jámiyetlik-siyasiy turmısı menen jáne de jaqınnan tanıstırıwda tiykarǵı dáreklerden paydalanıwǵa qaratılǵan. Sheriklik procesi tekst, foto hám video ónim, sonday-aq, hár qıylı temalardaǵı analitikalıq maqalalar hám málimleme-kommunikaciya texnologiyaları tarawında tájiriybe almasıwdı qamtıp aladı.
Maǵlıwmat ushın: “Yonhap News Agency” 1980-jılı bir neshe agentliklerdiń birlesiwi nátiyjesinde shólkemlestirilgen. 2003-jılı jańalıqlar hám kommunikaciyalardı úgit-násiyatlaw haqqındaǵı arnawlı nızam tiykarında wákillikli milliy agentlik sıpatında tán alınǵan.
Redakciya tarmaǵı 550-600 ge shamalas jurnalist hám fotoxabarshı, 60 tan aslam sırt el xabarshısınan ibarat. Agentlik kúnine 3 000 nan artıq tekst, foto, grafika hám video kórinisindegi material tarqatadı.
90 ǵa shamalas sırt el birge islesiwshileri menen isleydi. Koreys, inglis, qıtay, yapon, ispan, arab hám francuz tillerinde jumıs alıp baradı.

A.Xidirov, ÓzA