Ózbekstannıń insan huqıqları tarawında bilimlendiriw boyınsha baslaması tiyisli sessiyada kórip shıǵıw ushın usınılǵan Birlesken Milletler Shólkemi Insan huqıqları boyınsha keńesi (IHK) hújjetinde sáwlelendirildi. Esletip ótemiz, Jenevada 8-sentyabr kúni baslanǵan ánjuman 8-oktyabrge shekem dawam etedi. Hámmemizge belgili, aprel ayında
BMSh insan huqıqları tarawındaǵı Jáhán bilimlendiriw baǵdarlamasınıń tórtinshi basqıshın ámelge asırıw boyınsha mámleketimizdiń milliy bayanatı járiyalanǵan. Bul maǵlıwmat Insan huqıqları boyınsha Joqarǵı komissar basqarması tárepinen tayarlanǵan jıllıq bayanat hám Keńestiń “Joqarǵı komissar basqarması hám Bas xatkerdiń bayanatları” temasındaǵı hújjetine kirgizilgen. Bul hújjet kórip shıǵıw ushın 60-sessiyaǵa usınılǵan.
34 mámleket, sonıń ishinde, respublikamız avtorlıǵındaǵı materiallarǵa tiykarlanǵan bayanatta Jáhán baǵdarlamasınıń tórtinshi basqıshı (2020-2024) sheńberinde jaslar ushın insan huqıqları tarawında bilimlendiriw baǵdarlamaların ámelge asırıw boyınsha milliy ilajlardıń sholıwı berilgen. Tórt tiykarǵı baǵdar – mámleketlik siyasattı ámelge asırıw ilajları, oqıw baǵdarlamaları, metodikalıq materiallar hám qurallar, pedagoglardı tayarlaw hám qayta tayarlaw, insan huqıqları tarawındaǵı bilimlendiriwdi alǵa qoyıw ushın qolaylı sharayat jaratıw jolında qoyılıp atırǵan qádemler kórsetilgen.
Hújjette maǵlıwmatlar tiykarında juwmaqlar qáliplestirilgen bolıp, erisilgen nátiyjelerdi bunnan bılay da jaqsılaw boyınsha usınıslar berilgen. Úlgilerge mámleketimizdiń baslamaları, sonıń ishinde, 2021-jıl Jáhán baǵdarlamasınıń tórtinshi basqıshın ámelge asırıw boyınsha Milliy komissiya dúziw, sonday-aq, mámleketlik grantlar arqalı insan huqıqları tarawında puqaralıq jámiyeti joybarların qollap-quwatlaw ilajları kirgizilgen.
Ózbekstan hújjetiniń rásmiy bayanatqa qosılıwı mámleketimizdiń insan huqıqın qorǵaw, milliy bilimlendiriw baǵdarlamaları hám institucionallıq mexanizmdi rawajlandırıw, sonday-aq, xalıqaralıq strukturalar menen birge islesiwdi bekkemlew baǵdarındaǵı háreketiniń tán alınǵanın tastıyıqlaydı. Esabattı tayarlaw hám usınıwda qatnasıw ulıwma insanıylıq qádiriyatlar hám xalıqaralıq minnetlemege sadıqlıq kórinisi sıpatında tarawda global baǵdarlamanı bunnan bılay da ámelge asırıw ushın tiykar jaratadı.

ÓzA