Nókis qalasındaǵı oraylıq amfiteatrda Qol urısınıń R1 baǵdarı boyınsha professional sportshılar arasında «Aralboyı kubogi» xalıqaralıq turniri bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, barlıq qatnasıwshılarǵa áwmet tiledi.
Bunnan soń turnir bellesiwlerine start berildi.
Jarısqa Ázerbayjan, Belarus, Qırǵızstan, Rossiya, Túrkiya hám Italiya mámleketlerinen profesional sportshılar qatnasıp, erler 5, hayal-qızlar 1 salmaq kategoriyaları boyınsha óz-ara bellesti.
Keskin ótken bellesiwler sońında 62 kg salmaqta italiyalı Tosso Petro mámleketimiz wákili Abdumajid Qosimov penen bellesip, onda elimiz sportshısı jeńiske eristi. 73 kg salmaqta bellesken elimiz sportshısı Azizxon Abdullaev qırǵızstanlı Abror Hakimovtı jeńgen bolsa, 80 kg da Aybek Maxsetov ázerbayjanlı Gunduz Nabievke jeńilip qaldı.
Sonday-aq, elimiz sportshıları 97 kg hám +97 kg salmaq kategoriyalarında da ózleriniń sheberliklerin kórsetip, óz qarsılasları ústinen jeńiske eristi.
Atap aytqanda, mámleketimiz wákili Begzodbek Maxamatov túrkiyalı Shaxzade Maxsundı, Oǵabek Jumaniyazov rossiyalı Evgeniy Bolotskixge hesh qanday imkaniyat kaldırmadı.
Al, qızlar arasında bolsa, 70 kg salmaqta qatnasqan Nilufar Palvonova belaruslı Aseliya Medvedevanı jeńip, bas sıylıq iyesine aylandı.
Keskin bellesiwler astında ótken ushırasıwlar jıynalǵanlarda úlken tásir qaldırdı.
Jarıs sońında, jeńimpazlar xoshametlenip, olarǵa aqshalay sıylıqlar menen estelik sawǵaları tapsırıldı.

Qaraqalpaqstan xabar agentligi